Inhliam Nishikori tan Wimbledon a tawp

Kei Nishikori chu a chawn na vangin Wimbledon aṭangin a inhnukdawk. A inkhelh theih loh avang hian second round-a a khingpui tur World number 60 Santiago Giraldo chu walkover hmangin chak zawka puan a ni.

Japanese star Nishikori hi tun hnai­ah a khelh ṭhat avangin kuminah hian seeded pangana a ni pha hial a, a inkhelh hmasa berah Simone Bolelli hnehin beiseina sang tak nei mah se third round a inhlangkai thei ta lo a ni.

Kum 25-a upa tennis star chuan, "Ka match hmasa bera set hnuhnung berah khan na hi ka tuar tawh a, harsa tak chungin hnehna ka chang hram a nih kha. Tunah chuan ngun taka ka ngaihtuah hnuah inkhelh rih loh hi ka taksa tan a ṭha zawk a ni. Kuminah grass a inkhelh a nuamin inrintawkna ka nei lian hman tawh hle bawk. Amaherawhchu hliam nei chunga inkhelh luih chu nakin zel atan a ṭhat loh zawk dawn avangin lungngai tak chungin ka inhnukdawk ta a ni," tiin a sawi.

Asia aṭang mipa tennis player ngaihven hlawh ber leh lar ber ni mek Nishikori hi tunah World ranking-ah pangana a ni mek. Nikum khan Wim­bledon fourth round-ah a tlak hnuin US Open final a lut zui leh a, mahse Marin Cilic lakah a chak lo a ni.