Tualchhung Transfer BVT-in coach thar leh player thar 13 an la lut tawh

Mizoram Premier League Season 3-a parukna Bethlehem Vengthlang FC-in season thar­ah champion ngei an tum a, Chanmari FC assistant coach Lalsangzuala Hmar chu head coach atan an la lut a, player thar 13 an ziak lut tawh bawk. Player thar zingah MPL top scorer leh best forward ni tawh MS Dawngliana a tel.

Chanmari FC-in MPL3 season chawhnu lama an chhuah tir Dawngtea hian National Games-ah Mizoram gold medal a lak pui a, Bawngkawn tlangval kawppui tur hian Dinthar FC aṭangin PC Zosanga a lut bawk. Forward-ah hian an veng tlangval Lalzatluanga an ziak lut thar a, nikuma second division FC Bethlehem tana khel Zatea hian talent a nei ṭha hle.

Midfield-ah Chanmari FC leh Mizoram winger Lalruat­fela an nei thar a, an veng rawlthar MPL2-a Mizoram Police FC midfield mawitu K. Lalṭhathanga an la let bawk. Manipur aṭanga an chah luh Michael L. Khiangte leh Lian­khosiam te hi MPL hmel ti danglam thei an ni bawk. Club general secretary Lalruatfela Hmar-in Vanglaini palai a hrilh danin Zomi FC midfielder hlui Liankhosiam hi Manipur top league-a best player a ni.

Tlar hnungah Dinthar FC tlar hnung tichaktu MS Dawng­zela (Notea) leh Ramfangzaua te an lalut thar a, tawnhriat nei ṭha pahnih hian BVT tlar hnung an ti khawng sawt ang. Tin, Chanmari FC aṭanga an lak luh goalkeeper H. Lalremruata hi SYS FC-in MFA Cup an champion ṭuma best player a ni a, Manipur aṭanga an lak Ramhmasuon erawh a theihna la hriat chawp tur a ni.

BVT FC general secretary Lalruatfela Hmar chuan, "Coach ṭha tak kan nei thar a, Sanga hian CYMA Football leh NECS Cup-ah kan veng min kaihruai tawh a, kan rintawk hle. June 18 aṭangin khan kan practice ṭan a, I Day Football-ah result ṭha tak neih kan tum," tiin an coach thar a fak.

RF-a chuan sawi zuiin, "Player kan lak luh ṭhat avangin hlawh pe sang turah min ngai. Mak ang reng tak chu hlawh inangah player-te hian kan club an thlang a, nikum aiin kan budget a sang tam lo. Kan club-in ṭantu kan nei ṭha a, hei vang hian player-te pawhin kan club-a khelh an châk a ni. Kan player lak chinah kan lungawi a, pathum vel chu lak tum kan la nei a, kan hmanhmawh tawh lo ang," tiin uchuak taka pawisa an hman loh thu a sawi.