Europe-a player thiam ber Ronaldo

Champions League-a Real Madrid champion puitu leh a captain-na hnuaia Euro 2016-a Portugal champion puitu Cristiano Ronaldo chu a vawi hnih nan UEFA Best Player in Europe-ah thlan a ni.

Kum 31-a upa forward hian he dinhmun luah tur hian Real tana a khelhpui Gareth Bale leh Atletico Madrid forward Antoine Griezmann te chu a khum a ni. Bale hian an ram Wales chu Euro 2016-ah semifinal a hruai thleng a, Griezmann hian Atletico Madrid chu Champions League final a khelhpui bakah an ram France chu Euro 2016 final a hruai thleng bawk.

Hmeichhe lamah Lyon leh Norway striker Ada Hegerberg chuan Best Player chawimawina a dawng a, he chawimawina dawng tur hian France defensive midfielder Amandine Henry leh Germany midfielder Dzsenifer Marozsan a khum a ni.

Ronaldo a sang fal

Europe player ṭha ber thlang tur hian UEFA hnuaia ram 55 aṭangin journalist pakhat ṭheuhin an player duhzawng panga an thlang chhuak a, an player dahsan ber hi point nga pein a indawt dan zelin point an pe.

Player thlanchhuah zinga point hmu sang 10 chu second round-ah lutin vote thlak leh a ni a, top 3 thlan chhuah a ni. A sang pathumah hian vote 55 awm aṭangin Ronaldo hian vote 40 a hmu a, amah hnaih bertu Griezmann chuan vote riat (8) a hmu! Pathumna Gareth Bale hian vote 7 a hmu a, Ronaldo elpui ten Portugal captain an khan lo hle.

Ronaldo a lawm

Season hman zawh takah Ronaldo-a'n inelna hrang hrangah match 48 khelin goal 51 a khung a, Champions League nomawi an chawi theih nan match 12-ah goal 16 khungin a thawh hlawk hle.

Ronaldo hlawhtlinna hi a mimal thawhrah nia sawi theih nimah se Manchester United player hlui hian a ṭhiante a theihnghilh lo.

Kum 2014-a UEFA Best Player lo ni tawh chuan, "Chawimawina ropui tak a ni a, ka ṭhiante min puihna avanga he dinhmun luah thei hi ka ni tih ka inhria. Rim takin ka thawk a, mah se ka ṭhiante puihna lo chuan engmah ka ni lo. Real leh Portugal tana ka khelhpui ka ṭhiante hnenah lawmthu ka sawi a ni," a ti.

Ronaldo chuan Champions Lea-gue aia Euro nomawi a ngaihhlut zawk thu sawiin, "Champions League-ah chuan vawi thum ka champion tawh a, Euro nomawi chawi kha ka tan chuan a hlu bik a ni. Portugal tana nomawi ka chawi thei kha ka career ti famkimtu a ni," tiin a hlim hle.