City-ah Bravo a lut ta

Manchester City chuan Barcelona goal-keeper Claudio Bravo chu kum li chhung an hnena khel turin pound maktaduai 15.4-in an lalut a, a khelh ṭhat dan a zirin a man hi pound maktaduai 1.7 thlengin a sang chho thei ang.

Kum 33-a upa keeper chuan, "Manchester City ka zawm thei hi ka lawm takzet a, he club hian hmasawn zel tumin hmachhawp ropui tak an nei tih ka hriat avangin hlawhtlinna tam tak kan chhar ho ka beisei a ni," tiin City a zawm thei chu a lawm thu a sawi.

Chile international hian kum 2014 khan Real Sociedad aṭangin Bar-celona a zawm a, La Liga nomawi pahnih chawipuiin FIFA Club World Cup-ah a champion pui bawk. Kum 2015 Champions League nomawi an chawi ṭumin squad-ah awm mahse a inlan miah lo thung.

Bravo chuan, "Hlawh-tling taka kum hnih chhung hun ka lo hman tawhna Barcelona-te ang club ropui chhuahsan hi thil harsa tak a ni a, mah se Pep Guardiola nena thawhhona hun ṭha tak ka neih hi hnar phal chi a ni lo," tiin Etihad Stadium a pan chhan a sawi.

City manager Pep Guardiola chuan, "Clau-dio hi goalkeeper ṭha tak, kan squad minti chak thei tur a ni. Tawnhriat nei ṭha, hruaitu ṭha leh a vanglai hun hman mek a ni a, rei tak chhung ka lo veh tawh keeper niin City player a ni ta hi ka lawm hle," a ti.

Bravo-a'n City a zawm takah chuan an league match hmasa pathuma Pep-a'n a chhawr duh loh Joe Hart chu a chhuak ngei dawn niin a lang a, mah se kum 29-a upa keeper hi a club zawm tur nia an sawi Everton boss Ronald Koeman chuan lakluh tumna an neih loh thu a sawi avangin a club pan tur a la sawi theih loh.

Manchester City hian Pathianni zan dar 8:30-ah West Ham chu Premier League match khel turin an mikhual ang.