Champions League Pep leh Barcelona an intawng dawn

Ningani zan khan Champions League draw neih a ni a, Man-chester City manager Pep Guar-diola chuan a club hlui Barcelona chu group stage-ah a hmachhawn dawn. City leh Barca hi Group C-ah Borussia Monchengladbach leh Scottish champion Celtic-te nen an awmho a ni.

Champions League an khelh hmasak ber turah Premier League champion Leicester City an vannei nghal a, Claudio Ranieri-a naute hian group stage paltlang turin Portuguese champion Porto, Belgian league champion Club Brugge leh Danish club FC Copen-hagen te an hmachhawn ang.

Season hman zawh taka Cham--pions League nomawi chawi-tu Real Madrid-in an nomawi humhim turin Borussia Dortmund, Sporting Lisbon leh Legia War-saw te group stage-ah an paltlang a ngai dawn a, German club ṭha Dortmund tih loh hi chu Spanish club lian kawng dal tum tur chuan an te hret.

Premier League club inlan tur zingah Arsenal chu Group A-ah Paris St-Germain, Basel leh Ludogorets te nen an awmho a, Monaco, CSKA Moscow leh Bayer Leverkusen te nena awmho tur Tottenham Hotspurs last 16 zin-kawng a hautak lo tura ngaih a ni.

Barca leh Pep

Pep Guardiola-a'n Barcelona a enkawl chhungin nomawi 14 a chawi hman a, Catalan club manager hlawhtling berte zinga mi niin vawi hnih lai Champions League-ah a champion pui hman.

Spanish manager hian Nou Camp-a chhuahsan hnuah Bayern Munich enkawlin 2014-15 Champions League semifinal-ah a club hlui hi a hmachhawn a, hnehna a chang zo lo - tunah an intawng leh dawn ta.

City director of football Txiki Begiristain chuan, "Mangchhia ang maia ngaih tur a ni lo. Inelna ropui takah kan tel a, group harsa tak a ni dawn tih erawh phat rual a ni lo. Mahse, Pep hian Barca a hrechiang em em a, Germany-a hun a hman chhungin Gladbach pawh a bel hman viau a ni," tiin season li chhunga Barca vawi thum an hmachhawnna turah a zam lo.

Foxes dinhmun a ṭha

Leicester City-in football khawvel barakhaihin Premier League nomawi an chawi a, Champions League an khelh phah. Europe inelna sang bera an vawi khat inlanna turah last 16 an lut nghal lo ang tih a sawi theih ta loh!

Europe-a an inlan hnuhnung bera UEFA Cup 2000 first round pawh paltlang lo Foxes hi draw neih a nih hmain Atletico Madrid, PSV Eindhoven leh Besiktas te nen group khata awm ho thei dinhmunah an ding hman a, draw result-ah an lungawi hlein a rinawm.

Foxes director of football Jon Rudkin chuan, "Club kan hmachhawn theihte sulhnu thlirin draw neih a nih hma khan kan phur tawh a, Europe club ṭha tak tak nen group khatah kan awm ho a ni," a ti. Leicester vanneihna pholangtu chu anmahni ang thoa a vawi khat nana Champions League khel tur Russian club Rostov chu Atletico leh Bayern Munich te nen group khatah an awm ho!

London lam hawiin

Tottenham-in season ruk hnua a vawi khat nan Champions League an khel dawn a, Arsenal-in season 13 chhung a zawna last 16 an luhna thlen an tum dawn bawk.

Spurs group awmnaa harsa ber tur nia ngaih chu CSKA Moscow an ni a, Russian cham-pion hmachhawn hi a harsa dawn. Spurs manager Mauricio Pochettino chuan, "Russia-a inkhelh hi a harsa ṭhin tih kan hria a, CSKA hian team ṭha tak an nei dawn tih a chiang a ni," tiin awlsam taka last 16 luh a inbeisei lo.

French champion PSG-in season hmasa last 16-ah Chelsea an hnawt chhuak a, London club Gunners tan Group A-a an hmachhawn tur team-ah chuan hautak ber tura ngaih an ni.