Champions League khel thei an pung dawn

Europe-a football thu-neitu sang ber UEFA chuan 2018-19 season aṭang chuan Europe-a league lian pali Spain, Germany, England leh Italy te chuan Champions League-ah club pali ṭheuh an thawh theih tawh tur thu an puang.

Tun dinhmunah Spain, Germany leh England league-a pathumna chin club ten playoff khelh ngai loin Champions League group stage an thleng nghal a, palinain playoff an khel ṭhin thung. Ruahmanna tharah chuan heng league pathuma palina te hian 2018-19 season ṭan dawn aṭang chuan playoff an khelh a ngai tawh dawn lo tihna a ni.

European league sang pali zingah Serie A chu hlep ṭha bera ngaih an ni. Tun dinhmunah Serie A aṭang hian pakhatna leh pahnihna chiah hi Champions League group stage tling chiang an ni a, pathumnain playoff an khel ṭhin. Kuminah pawh Serie A pathumna Roma chuan playoff-ah Porto an hneh loh avangin Champions League an khel thei dawn lo.

UEFA-in he thutlukna a siamna chhan hi tun hnaia Europe club lian lungawi lo ten European Super League siam an tum vang niah ngaih a ni a, a bik takin tun hnaiah Premier League club te chu Europe-a an chet ṭhat loh avangin Champions League-a an hmun chan zat a tlahniam hman ṭep a ni.