Zaninah 100% chak record nei Hull City Vs Manchester Utd

Zanin dar 10:00 hian Manchester United-in Hull City an hmachhawn dawn a, Jose Mourinho hote tan KC Stadium-ah point thum a chiang lo. Hull khelmualah hian champion lai Leicester City chu season ṭan niah 1-2 in an mualpho a, Premier League kai thar Tigers hian club hming langsar Arsenal leh Liverpool te ang lo takin vawi hnih khelh
aṭangin point ruk an hmu tawh.

Hull City manager Steve Bruce chu season ṭan hmain a bang a, senior player 13 chiah nei mah se match hnih khelhah an la chak ve ve. Tuna enkawl lailawktu Mike Phelan hian kum 12 chhung Old Trafford-ah coach hna a lo chelh tawh a, Sir Alex Ferguson thachhhang dawltu niin Scottish manager chawlh rualin United a chhuahsan.

Kum 53-a upa Phelan chuan, "Team lian leh team tenau kan inhmachhawn dawn a, hmabak ko tak a nih rualin chona phurawm tak a ni. Tunah hian United hi an insiamṭha mek a, an squad pawh position tinah chak lohna lai a awm tawh lo. Manager an thlak hnu hian anni aia ṭha an awm bik chuang lo," tiin a club hlui leh a hmachhawn tur club chu a fak thiam hle.

Nimin tlai lama Europa League draw neih vangin Mou-rinho-a'n media a hmachhawn tlai hret a, thuthar thehdarhtute pawhin Hull City lam ni loin Europe inelna chungchang an zawt hmasa. Portuguese manager chuan, "Europa League hian Champions League a tluk pha lo tih kan hre vek a, mah se Fenerbahce leh Feyenoord te nen group khatah kan awm. Team
ṭha nena group khata kan awm avangin supporter-te pawhin Europa League khelh hun an nghakhlel sawt ang. Ukraine club Zorya Luhansk erawh ka hriat loh lam an ni," tiin an group-a awmte vanga a phur thu a sawi.

Khelhna hmun chang lo Bastian Schweinsteiger chungchang sawiin Mourinho chuan, "A khelh theihna hmun midfield poisition pahnih ruak hnawh khat turin Pogba, Herrera, Schneiderlin, Fellaini leh Carrick te ka nei. Tuna a awm danah hian a lungawi a nih chuan ka sawi theih bak a ni a, a hmalam hun chu a thutlukna a ni. Bayern Munich hian an ngaihven viau a nih chuan tun thlenga Bayern chairman Karl-Heinz Rummenigge-a'n an player hlui la let tura Untied an la dawr lo hi a mak a ni," tiin amah sawiseltute chu a chhang let.