Spurs khelmuala inlan tur Liverpool

Liverpool manager Jurgen Klopp-a'n Anfield-ah sulhnu ropui tak hnutchhiah a, Reds manager ropui nih a duh thu a sawi a - vawiin tlai dar 5:00 hian Tottenham Hotspurs hmaah fiahna a hmachhawn nghal dawn.

Spurs hi season hman zawh taka Leicester City nen champion inchuha inum kha an ni a, season ṭantira White Hart Lane-a lenluh hi Jurgen Klopp-a ṭawngṭai chhanna a niin a rinawm loh.

Hriatthiam har Reds

Liverpool-in pre-season match-a Barcelona 4-0 a an sawp hnu lawkah Mainz 4-0 in an hneh lo a, league match hmasa bera Arsenal 4-3 a an hneh hnu lawkah Burnley 2-0 a hneh loin EFL Cup-ah Burton Albion chu 5-0 in an sawp thung!

Jurgen Klopp-a'n a naute game rang a khelhtir a, attac­king football hmuhnawm tak an phochhuak ṭhin - chumi ruala lang chhuak erawh an goal nawrna lamah tlar hnungin ngaihthah a hlawh a, tihsual a langsar hma bik - tlar hma nei
ṭha Spurs lakah fimkhur a ṭul ang.

Liverpool midfielder Emre Can leh Divock Origi chu hliam vangin an dinhmun a chiang lo a, Sadio Mane-a'n Burnley a hmachhawn theih loh hnuah Burton tlar hnung a chaih phar leh tawh a, defender Joel Matip hliam a dam tawh bawk - Reds tana chanchin lawmawm loh bera chhal ngam erawh hliam vangin Philippe Coutinho inlan theih dawn leh dawn loh a chiang lo!

Lloris tel loin

Spurs-in malpui hliam goal­keeper Hugo Lloris tel loin Reds an hmachhawn a ngai dawn a, a harsa sawt ang. Tottenham manager Mauricio Pochettino chuan, "Reds hi an che rang a, team in man tak niin counter-attack ah an hlauhawm thei hle. Burnley hneh lo hlim an nih avangin an theihna zawng zawng nen an rawn khel dawn a, kan tan a harsa dawn a ni," tiin an inkhel tur a thlirlawk.

Champion duh Klopp

Reds boss Klopp chuan, "Tun dinhmunah chuan Anfield-ah hian ka hlim em em a, kum ruk liam hnuah he hmuna ka hun hman hi thlirkirin ka hun ka khawhral mai mai lo tih hriat ka duh a, kumtin nomawi chawi ka duh a ni," tiin a sawi a, Spurs lakah hnehna chan ngei a tum.

German coach hian Burton an hmachhawn ṭumin wing-ah Daniel Sturridge a chhawr a, Eng­lish striker hian a lawm loh thu Klopp hnenah a sawi. Mahse, Klopp chuan, "Burton laka goal hnih a khung khan khelmual laiah a awm a, a kil lam­ah a awm reng dawn tihna a ni lo. Football-ah chuan inthlak danglam a ngaih chang a awm a, Daniel nen hian kan titi dun tawh a, buaina a awm lo," tiin a sawi.