Spurs-ah Gareth Bale a kir ta

Kum 2013-a pound maktaduai 85-a Gareth Bale an chhuahtir hnuah Tottenham Hotspur chuan Bale thlaktu tur an hmu ta - Bale bawk a ni!

Kum 31 mi forward hian rei tak titi a awm hnuah season khat chhung atan loan-in Spurs a zawm a, hetih rual hian hliam nei chunga London-a kir a nih avangin October international break zawhah a inlan thei 

chauh ang. 

Bale chuan, "He hmuna ka lo kir leh thei ta hi ka lawm takzet a, ka hming ka lo chher tawhna a nih avangin ka tan chuan club danglam bik a ni," tiin 

a sawi. 

Bale hian kum 2013-a Real a zawm khan kum ruk chhung atan contract a ziak a, kar khatah £300,000 a hlawh - kum 2016-ah kum ruk dang cham turin contract thar a ziak a, a leta a hlawh tihpun niin kar khata £600,000 hlawh tura tih a ni. 

Welsh forward hian Real-a a contract hi hmang zo se chuan bonus-te nena chhiar telin pound maktaduai 150-a hlawh hman dawn tihna a ni. Mahse, Zinedine Zidane-a'n Real-a enkawl hnuah Bale-a tla tlum lo a, French manager nena an inkar chu sawi nawn ngai a ni lo. 

Bale chuan, "Real ka pan hnuah nomawi chawi tura rilru paukhauh put a ngaihzia ka zir belh a, heng zawng zawng hi tawnhriat aṭanga neih chi a ni. Chu rilru put hmang chu Spurs dressing room-ah ka put luh theih ka beisei," a ti. 

Kum 2007-a Southampton aṭanga kum 17 mi lek nichunga Spurs zawmtu Bale chuan, "Tottenham ka chhuahsan khan he hmuna lo kir leh hi ka la duh ngei ka ring rilru ṭhin. Kan inrem thlap a, ka tan chuan hun duhawm a ni," a ti. 

Real-a a cham chhunga Champions League nomawi pali chawitu chuan, "Inkhelh chakin ka tuihal a, ka phur em em bawk. Team tan theihtawp chhuah ka duh a, bul ṭan hlan ka nghakhlel em em a ni," tiin a sawi bawk. 

Mahse, Bale hian Wales tana a inlanna lamah hliam a neih avangin Spurs jersey nen khelmual a rap thei lawk dawn lo a, London club-a zawm hnua an match hmasa pangaah a inlan thei lo ang.

Bale hian Real-ah a phu angin fak a hlawh tawk lo nia sawi a awm ṭhin a, a tifiah turin nomawi leh stats en tur a awm - Real tan Champions League nomawi pali bakah La Liga (2), Copa del Rey (1), UEFA Super Cup (3) leh FIFA Club World Cup (3) nomawi a chawi. 

Real tan inelna hrang hrangah match 251 khelin goal 105-a khungsak a, assist vawi 68 ngawt a nei bawk - heng zingah hian bench aṭanga luh a nei nual tih hriat tel a ṭha. 

La Liga bikah phei chuan match 171 aṭangin goal 80-a khung a, assist vawi 40-a nei - minute 104 dan zela goal thawk chhuak ang a ni a, hetiang ang record ropui nei thei player hi an tam lo.