Arsenal an chak, Arteta a lungawi

Arsenal manager Mikel Arteta chuan West Ham an hneh ṭuma a naute khelh danah a lungawi thu a sawi a, an rilru paukhau chu an chak chhan pawimawh tak nia a hriat thu a 

sawi bawk.

Inrinni zan Emirates Stadium-a Premier League inkhelah Gunners hian an mikhual Hammers hi 2-1 in an hneh. Mualneitu lam tana Alexandre Lacazette goal hmahruai chu Michail Antonio-a'n sut mah se bench aṭanga lut Eddie Nketiah-a'n chakna goal a khung.

Arteta chuan, "Hun tawp lam minute 25 chhunga na taka kan nawr kha a hmuhnawm ka ti, point thum hmuh ngei tuma kan beih letna khan rah ṭha a chhuah. Si phurh emaw goal khung loh emaw hnuah rilru hnual mai chang kan nei ṭhin, tunah erawh kan ngaihtuahna a danglam tawh," a ti.

Contract ziak thar hlim Auba-a'n goal khung lo mah se Lacazette khung tur a siamsak a, league match hmasa an khelh laia khelmual pawn lama inbakkaih Dani Ceballos leh Nketiah ten goal an sual chhuak a, goal lawm nan boruak ṭhatzia an lantir bawk.

Hri leng vangin season hmasa an hmang rei a, season thar inbuatsaihna an neih mumal loh bakah match khelh tur inhnaihchilh a awm nual dawn - hei vang hian Arteta pawhin player a siksawi chho zeuh zeuh dawn niin a lang.

Fulham an hneh ṭuma khel ṭha tak Ainsley Maitland-Niles leh Mohamed Elneny te aiah Bukaya Saka leh Dani Ceballos ten inkhel bul an ṭan a, hliam vangin Kieran Tierney chu chawpchilh taka thlak niin a hmun ruakah Sead Kolasinac a inlan thung a ni.

Gunners hian League Cup third round khel turin Nilaini zanah Leicester an lenchilh dawn a, September 28, Thawhṭan zanah EPL champion  Liverpool khel turin Anfield an pan zui a ngai dawn bawk.