Everton 5; Calvert Lewin 3; West Brom 2

Inrinni zan Premier League inkhel hmuhnawmah Everton-in goal nga ngawt an khung a, Premier League kai thar West Brom chu 5-2 in an hneh. 

Merseyside club tan Dominic Calvert-Lewin chuan a career-a a hattrick hmasa ber a siam a, James Rodriguez chuan a thiam a la theihnghilh lo tih pholangin goal leh assist a nei bawk. 

West Brom hian Everton khelmualah goal an khung hmasa zawk a, Grady Diangana chuan minute 10-na lekah Carlo Ancelotti naute a barakhaih. 

Everton-in Calvert-Lewin leh Rodriguez hmangin an chhanglet lehnghal a, Baggies hian Matheu Pereira freekick mawi zet hmangin si phurh an sut - mahse first half hun pek belhah Baggies defender Kieran Gibbs hnawhchhuah a ni a, West Brom-in a tlem zawk nih an tuar zui. 

Calvert-Lewin-a'n goal hnih dang a khung belh a, Michael Keane-a'n goal khat thawh bawkin a tawpah 5-2 in Everton an chak -  2012-13 season hnua Premier League-a an match hmasa pahniha Everton an chak hmasak ber a ni. 

Everton manager Carlo Ancelotti chuan, "James Rodriguez kha ka lawmpui takzet a ni. La dai ngai loh ramah league thar a rawn hmachhawn a, a awlsam lo. Mahse, quality sang tak nei player a nih avangin awlsam hmel takin a lantir a ni," a ti. 

Goodison Park-a inkhelah hian Baggies boss Slaven Bilic chu hnawhchhuah a ni bawk a, Croatian manager hi Gibbs hnawhchhuah a nih avanga a lungawi lohna a lantir nasat avangin hnawhchhuah a ni.