Arsenal leh Leicester an tho chhuak

Premier League champion lai Leicester City leh pahnihna Arsenal ten tun season-a a vawi khat nan league-ah hnehna an chang ve ta. Inrinni zan inkhel dangah Liverpool leh Tottenham Hotspur te 1-1 in an inhnehtawk a, manager thar Ronald Koeman kaihhruaina hnuaiah Everton an la tlawm lo zel bawk.

Laipui a puak

Arsenal leh Watford te hian an match hmasa pahnihah vawi khat tlawmin ṭum khat an khingpuite an inhnehtawk pui ve ve a, Inrinni zanah erawh Gunners-in hmel danglam an nei ta. Arsene Wenger-a nauten ṭum danga an lo tih ṭhin tawh danin lei hrulah ball an in pe kual nasa a, Euro 2016 khelh vanga chawlh nei rei bik Mesut Ozil-a'n inkhel bul ṭanin Gunners game chawinungtu a ni leh der tawh.

Santi Cazorla chuan minute kuana lekah Alexis Sanchez hlawhchhuah penalty a khung. Copa America best player hian minute 40-naah Theo Walcott siamsak hmangin angle zim tak aṭangin an goal hnihna a khung. Chile international hian a la duh tawk mai lo, first half tawp hma chiahin Ozil-a tauh luh tur a siamsak bawk. Second half-a substitute Roberto Pereyra goal khat khung chu Watford mualpho lutuk tur venna mai a ni - a tawpah inkhel a chungnung zawk Arsenal 3-1 in an chak.

Arsenal manager Arsene Wen-ger chuan, "Bul kan ṭan
ṭhat avangin chawlhlawk nuam takin kan hmang thei. Kan taksa a la inpeih kim lo deuh tih erawh second half-ah khan a hmuh theih," tiin a sawi.

Watford manager Walter Mazzarri chuan, "Petr Cech a khel ṭha a, ani khan a team a chhanhim. Ka naute khelh danah ka lawm tho a, point kan hmu lo erawh a pawi," a ti. Mazzarri hian an khingpuite ang tho a duhthusama an la inpeih bik loh thu a sawi tel bawk.

Player thar

Inkhelh banah Arsenal ma-nager Wenger chuan player thar pahnih an lakluh thu a sawi lang. Gunners hian pound maktaduai 52 velin Germany defender Shkodran Mustafi leh Spanish striker Lucas Perez te an lalut.

Wenger chuan, "Player thar pahnih Mustafi leh Perez te kan nei, annni pahnih lalut tur hian kan thawkrim hle. Tunah rih chuan midang ngaihven kan nei tawh rih lo," tiin a sawi.

Arsenal hian tun nipui chhung-in midfielder Granit Xhaka leh Kelechi Nwakali, defender Rob Holding leh forward Takuma Asano te an lo lalut tawh bawk a, kum dang ang lo takin player thar lakluh nan Wenger hian pound maktaduai 100 dawn a hmang ta.

Foxes an lo lang e

King Power Stadium-ah ruah sur nasa vangin khel-mualah tui a tam hle a, Leicester leh Swansea player tan inkhelh harsat phah deuh mah se a ti hmuhnawmtu a ni tel thung a, a tawpah Foxes 2-1 in an chak.

Season hmasa league goal 24 khungtu Jamie Vardy chuan Danny Drinkwater thawhrah sengin minute 32-naah tun season-a goal khatna khungin second half-ah Wes Morgan chuan mual dinglam sir aṭangin an goal hnihna a khung bawk.

Arsenal lei theih loh PFA Player of the Yea Riyad Mah-rez-a'n penalty a pet goal lo - Gun-ners keeper hlui Lukasz Fa-bianski-a'n a lo dan sak bakah Poland international hian Foxes forwardShinji Okazaki goal khung tur a dansak zui bawk. Minute 80-naah Swansea tan Leroy Fer-a'n goal khat tauh lut ve mah se result a khawih danglam phak lo.

Reds leh Spurs intiat

Jurgen Klopp-a nau ten White Hart Lane-ah minute 43-naa James Milner-a penalty chhuih luh hmangin point thum an hmu dawna a lan laiin Tottenhman tan defender Danny Rose chuan an siphurh sutin team pahnihte point khata an lungawi tawn a ṭul.

Tottenham goalkeeper Michel Vorm-a'n Philippe Coutinho leh Joel Matip te goal khung tur ropui takin a dang a, Reds winger Sadio Mane goal khung chu offside vangin pawm a ni lo bawk. Mauricio Pochettino nauten si an phurh hnuah an beidawng duh bik lo a, Toby Alderweireld ball tauh ṭha tak chu Liverpool keeper Simon Mignolet-a'n dan sak mah se Rose ball pet erawh a dang thei bik lo.

Spurs hian an khelmualah Liverpool lakah sulhnu an nei ṭha lo a, kum 2012 November thlaa Gareth Bale-a'n goal a khung hnuah Rose hi White Hart Lane-a Reds laka goal khung leh thei hmasa ber a ni.

Inkhel dang

Ronald Koeman a kaihhruai Everton-in tun season-ah chak loh an la nei lo. An match hmasa bera Spurs nen 1-1 a an inhnehtawk hnuah West Brom 2-1 in an hneh a, tunah Stoke City 1-0 in an hneh leh ta. Everton tan Romelu Lukaku leh Ashley Williams te bell pet chu goal line aṭanga pet chhuah sak an ni a, Leighton Baines-a penalty petin goal ban per mah se ball lo kal let hian Potters keeper Shay Given perin a lut.

Inkhel dangah Southampton leh Sunderland te 1-1 in an inhnehtawk, Saints tana Jay Rodriguez goal khung chu Black Cats striker Jermain Defoe-a'n minute 80-naah penalty aṭangin a sut - Defoe hian a club tan khelmuala a match hnuhnung parukah goal a khung vek.