Inter-in Gabigol an lalut hnai

Serie A club Inter Milan chuan 'Gabigol' tia hriat lar Brazilian rawlthar Gabriel Barbosa an lalut hnai a, kum 19-a upa striker hi Milan-ah medical nei tura awm tawhin he thuziak i chhiar meuh chuan contract a ziak fel tawh mai thei.

Italian club hian Gabi-gol bakah hian Sporting Lisbon midfielder Joao Mario chu lakluh tumin an dawr bawk a, Euro 2016-a Portugal champion team midfielder man zat hi pound maktaduai 30 bawr vel ni tura ngaih a ni.

Inter manager thar Frank de Boer chuan, "Player ṭha tak ve ve an ni a, mah se tuin nge kan club rawn zawm dawn tih lo sawi lawk hi ka duh lo," tiin thui tak a sawi duh lo thung.

Chelsea nen pawha sawizawm hlawh Barbosa hian Olympic neih zawh takah football gold dawngtu Brazil tan khelin an player pawimawh pawl a ni a, Copa America Cen-tenario-a Brazil squad-ah khan a tel bawk.

Inter Milan hi Chinese company Suning Group-in neitu nihna an neih hnuah manager Roberto Mancini nen inhmuthiam loin Italian manager hian a bansan a, a thlak nan Dutch manager De Boer an lalut a ni.