Run 1-a India ngamtu Windies

Nizan khan India leh West Indies chu Twenty20 international-ah an inhmachhawn a, T20 match hmuhnawm ber pawla chhal ngamah hian Windies hian run 1-in hnehna an chang.

West Indies an bat hmasa zawk a, over 20-a run 245 siamin mi paruk an hloh - India tan um huphurhawm tak a ni. West Indies tan Evin Lewis a che ṭha fal a, kum 24-a upa opener hian ball 49 a hmachhawnah run 100 vaw chhuakin ball 33-a run 79 vaw chhuaktu Johnson Charles chuan a pui ṭha viau bawk.

India bat hun a thleng a, opener Rohit Sharma chuan ball 28 a hmachhawnah run 62 siamin bulṭan ṭha viau mah se run 7 lek siamtu Ajinkya Rahane leh run 16 vaw chhuaktu Virat Kohli te an out a, India beisei a bo hman.

Mahse, India-in awlsam taka tlawm mai an tum bik lo. Beisei loh lam aṭangin Lokesh Rahul a inlar a, kum 24-a upa batsman hian ball 51 a hmachhawnah run 110 siamin a tawp thleng a dam a, captain MS Dhoni chuan ball 25-a hmachhawnah run 43 a siam bawk - mahse, India-in over 20-ah mi pali hloha run 244 chiah tlinin an out vek a, inkhel hmuhnawmah run 1-in a tlawm zawkah an ṭan a ṭul.

Lokesh Rahul-a century siam hi T20 chanchina 100 rang ber dawttu a ni a, Windies-in vawi 21 lai six vaw chhuakin T20-a six vaw chhuak hnem ber an ni. Windies run siam zat hi T20 match khata run siam hnem pathumna niin India siam zat hi palina a ni nghal bawk - team pahnih run siam zat hi 489 niin T20 chanchina match khata run tam ber ṭum a ni.

Nizan dar 7:30 khan West Indies leh India hi an inhmachhawn leh a, he thuziah a nih lai hian an result kan hre hman lo. India leh West Indies hi test series-a inhmachhawn zo hlim niin match li khelhah India vawi hnih chakin vawi hnih an inhnehtawk a, India hian series hi 2-0 in an la.