Hattrick nena bulṭantu Lewandowski

German Bundesliga chu Zirtawpni zan khan khelh ṭan a ni a, champion lai Bayern Munich chuan Robert Lewandowski hattrick hmangin Werder Bremen 6-0 in an sawp. Inrinni zan inkhel dangah Borussia Dortmund chuan Mainz hnehin point thum an hlawh chhuak ve bawk.

Pep Guardiola thlaktu Carlo Ancelotti-a'n Allianz Arena-a a league match hmasa berah nipui transfer laia a lakluh Mats Hummels chuan inkhel bul
ṭanin German international hian minute 90 chhung a khel a, pound maktaduai 27.5 man rawl-thar duhawm Renato Sanches erawhin bench-ah a hun a hmang tluan.

Bayern hian ball possession 71% zet changin inkhel bul-
ṭan aṭanga tawp thlengin an chungnung tluan chhuak zak a, minute kuana lekah midfielder Xabi Alonso chuan volley lut nghal in he goal hi Bundesliga top scorer Lewandowski goal thum, captain Philipp Lahm leh Franck Ribery te goal in a zui bawk, goal khung lo mah se Thomas Muller a langsar lehpek hle a, an goal ruk zinga pathum hi a siamsak a ni.

Season ṭan hmaa German Super Cup chawipui tawhtu coach Ancelotti chuan, "Bayern hi team ṭha tak awmsa an nih avangin thil ka thlakthleng vak lem lo, bul kan ṭan fuh a, goal kan neih hma bawk avangin a awlsam phah hle. A khaikhawm nan chuan a ṭha vel vek e," a ti.

Season hmasa league goal 30 khungtu Lewandowski chuan attacking game an khelh vanga nuam a tih thu leh goal a khung ai mahin an team-in hnehna an chang chu lawmawm a tih thu a sawi ve bawk.

Hei le Dortmund

Bayern-in point thum an hmu a, striker Lewandowski chuan goal thum a khung bawk tih hre chungin Dortmund chuan Inrinni zan khan an league match hmasa ber an khel ve. Thomas Tuchel-a naute an chesual duh bik lo a, forward Pierre-Emerick Aubameyang goal hnih hmangin Mainz 2-1 in an hneh.

Dortmund tan Andre Schurrle-a'n inkhel bul a ṭan a, Chelsea player hlui hian minute 17-naah Aubameyang goal khung tur a siamsak. Goal nei nghal mai mah se season hmasa Bundesliga pahnihna hian an goal hnihna khung turin an nghak rei hle.

Season hmasaa league goal 25 khung thei Aubameyang chuan minute 89-naah penalty a ṭanga khungin hun tawp hma chiaha Yoshinori Muto goal khungin Mainz a chhanhim zo tawh lo.

Dortmund hian an khelmual Signal Iduna Park hi an hma-ngthiam hle a, legaue match an khelh hnuhnung 22-ah hneh loh nei miah loin vawi 19 an chak a, ṭum thum chu an khingpuite nen an inhnehtawk thung.

Borussia Dortmund boss Thomas Tuchel chuan, "Attacking game kan khel a, duhthusam erawh a la ni lo. Ṭha tak takin ball inpe kual mah ila kan khingpui defender-te hmaah ho angreng taka tihsual kan la nghah a, kan zir chhunzawm ang," a ti.