Real chak zanah Atletico an chuai

Alvaro Morata chuan Real Madrid-a a kir hnua a goal hmasa ber khungin Celta Vigo lakah a team hi 2-1 in hnehna a chanpui a, vawi hnih league match an khelh tawhah an vawi hnih chakna a ni ta.

Atletico Madrid erawh-in beisei an phak lo chhun-zawm zel a, an league match hmasa bera Segunda divi-sion champion Alaves an inhnehtawkpui hnuah La Liga kaithar Leganes nen goal khung loin an inhnehtawk leh, Atletico Madrid thiampuipa Antoine Griezmann chuan hma an sawn loh chuan relegation battle an hmachhawn tur thu a sawi!

Vanduai vannei

Santiago Bernabeu-a in-khelah Celta Vigo-in Real an hlau bik lo a, Cristiano Ronaldo leh Karim Benzema tel loa khel mualneitu team hian Luka Modric leh Gareth Bale hmanga woodwork an pet per hnuah an vanduai a kaltluang dawn niin a lang hman.

Mahse, minute 60-naah Al-varo Morata a inlar a, Juventus lama season hnih a hman hnua kir leh striker hian Marco Asensio ball pet Celta Vigo goalkeeper Sergio-a'n a lo dan per chu awlsam takin a khung.

Minute sarih a liam hman chauh a, Celta Vigo tan Fabian Orellana chuan an si phurh sutna goal khung ve nghalin Real fan-te hlim zai lai a tih tawp sak. Mahse, hun tawp nan minute kua chauh a awm tawh tihin player hlawh hnem danglamna a lang a, midfielder Toni Kroos chuan goal 'special' khungin Real an chak.

Zidane thukhawchang

Real Madrid coach Zinedine Zidane chuan, "Game ṭhenkhat-ah chuan ka duhthusam angin kan khel lo tih hi phat chi a ni lo. Mahse, UEFA Super Cup kan chawi hnuah league match hnih hnehna kan chang leh tawh a, season kan ṭan danah ka lawm a ni," a ti.

Tun hnaia chhuak tur anga sawi James Rodriguez chuan bench aṭang bawkin inkhel bul a ṭan a, Spanish infiamna lam ziaktu chanchinbu lar AS chuan Colombian midfielder hian Celta lakah inkhel bul a
ṭan lo a nih chuan chhuah a tum niin an tarlang tawh.

Mahse, Zidane chuan pound maktaduai 71 thleng a man pung thei tura an lei midfielder chungchang hi sawiin, "Second half-a a luh hnuah James khan a khel ṭha takzet a, zanina ka sawi nawn duh chu Santiago Bernabeu-ah hian a cham chhunzawm zel dawn tih hi a ni," tiin a sawi.

Atletico an buai

Atletico Madrid-in Alaves an hneh zawh loh hnuah in-siam-ṭhatna remchang nei mah se season hmasa Segunda pahnihna Leganes lakah an chungnun zawkna an lantir thei lo a, league match hmasa bera inlan lo Antoine Griezmann lo kirin awmzia a nei thui lo hle.

Diego Simeone-a naute hian Leganes tlar hnung inremphui an paltlang thei meuh lo a, first half-ah Griezmann hmanga vawi khat chiah shot neiin UEFA Best Player dinhmun luah tura Ronaldo tluk lotu hian a league match hmasa berah beisei a phak lo.

Simeone a zam lo

League match hmasa pahnihah Atletico-in hnehna an chang zo lo a, hetichung hian manager Simeone a zam lo. Argentine manager chuan, "Rilru hahdam taka awm a, hnathawh chhunzawm zel hi kan tih tur chu a ni mai. Goal hmaah kan hriam tawk lo tih ka pawm a, mah se ka player-ten an theihtawp an chhuah avangin ka lawm a ni. Goal khung kan tum luatah kan zam deuh a ni mai thei a, mah se kan hriatreng tur chu secondhalf-ah chance kan insiam nual a, kan khingpuiten an insiam ve lo," tiin a naute a sawisel duh lo.

Season hman zawh taka Champions League final leh Euro 2016 final kheltu Griezmann-a'n a pu ngaihdan a ṭawmpui ve lo. French forward chuan, "Hetiang renga kan khel a nih chuan relegation battle kan hmachhawn mai ang. Tun aṭang hian hmasawn tura kan thawh a ngai a, keimahni aṭang ṭheuh hian bul kan ṭan a ngai a ni," tiin an team chuan hmasawn an mamawh thu a sawi.