Chennaiyin tan Riise khel dawn

Indian Super League champion Chennaiyin FC tana khel tur John Arne Riise chungchangah Delhi Dynamos lamin buaina siam mah se Liverpool defender hlui hian South Indian club tan hian a khel thei dawn.

AS Roma defender hlui hian ISL-ah buaina a lo tawng zeuh zeuh tawh. India rama a khelh hmasak ber dawn khan Delhi a zawm hma hian Kerala Blasters tan contract a lo ziak tawh a, mah se Sachin Tendulkar-a club hi hawisanin Delhi club a zawm. Tun season atan Chennaiyin a zawm a, Delhi Dynamos hian season hmasaa Riise contract an ziahpui khan Indian club dang a zawm theih loh tur thu an ziak tel niin an sawi.

Mahse, Delhi a chhuah--san hnua a khelhna Norway club Aalesunds FC chuan Riise hi International Transfer Certificate (ITC) an pek miau avangin All India Football Federation (AIFF) chuan Liverpool nena Champions League nomawi lo chawi tawh defender hi Chennaiyin tan a khelh theih tur thu an puang a ni.

Kum 35-a upa defender hian March khan inkhelh a chawlhsan thu leh phurna a neih tawh loh thu puang mah se Chennaiyin FC tana khel turin a kir leh a, South Indian club tana a khelh zawhah hian football a chawlhsan tak tak dawn niin an sawi.