Rome khawpuiah Nadal a chak lo

Rafael Nadal chu Rome Open-ah quarterfinal paltlang zo loin a tla a, world number 1 Novak Djokovic erawhin harsatna lian tham lutuk tawk loin semifinal a inhlangkai thung.

Rome khawpuiah hian Nadal hi player chungnung bik a ni, ṭum kua ngawt a champion tawh - Inrinni zan inkhelah erawh Diego Schwartzman lakah 6-2, 7-5 in a chak lo. Argentine tlangval hian tennis a khelh hun chhunga a vawi khat nan Nadal a hneh.

Spanish tlangval Nadal chuan, "Chhuanlam siam hun a ni lo, ka khel ṭha tawk lo a ni tih pawm mai a ngai," a ti. Nadal hian inkharkhip hnuah a vawi khat nan tournament a khel leh chauh a, beisei a phak lo hi a mak hran lo.

Grand Slam vawi 19 champion tawh Nadal hi Covid-19 vangin nomawi a kawlna US Open-ah a inlan lo, tunah chuan September 27 aṭanga khelh tur French Open 2020 atan rilru a seng chhunzawm nghal ang.

Inkhel dangah Djokovic-a'n seeded palina Matteo Berrettini chu 4-6, 6-3, 7-6 (7-5) in a hneh. US Open aṭanga an paihthlak hlim Novak hi a thinrim a insum zo lo leh, a service game a lak loh vanga thinrim chuan a racquet-in lei a vua!

World number 1 Djokovic hian nizan khan Casper Ruud a hmachhawn leh a, result kan hre hman lo. Semifinal lehlamah Schwartzman leh Grigor Dimitrov 6-2, 3-6, 6-2 a hnehtu Denis Shapovalov an in hmachhawn 

ve thung.