Juve tan Khedira bawk

Serie A champion Juventus chuan tun season a an league match hnihna chu Zirtawpni zan khan khelin Lazio lakah 1-0 in hnehna an chang - inkhel dangah Napoli-in 4-2 in AC Milan an hneh bawk.

Juventus-in nikum nipui lai khan Real Madrid aṭangin Sami Khedira an lalut a, hliam vangin season bul a ṭan thei lo. Kuminah erawh German midfielder-in duhthusama ṭhain bul a ṭan ta. Fiorentina 2-1 a an hneh ṭumin goal a khung a, tunah Lazio an hnehna goal awmchhun khungtuah a ṭang leh tawh.

'Thau' tia sawisel tawk, pound maktaduai 75.3 man Gonzalo Higuain chu minute 65-naah bench aṭanga luh tir leh a ni a, Argentina striker hian a match hmsa ber angin goal a khung tawh lo thung.

Massimiliano Allegri naute hian season li chhung chu hneh sawh takin Serie A-ah ro an rel tawh a, season hmasa tawp lam nena chhiar zawmin tunah hian an league match hnuhnung 30 aṭangin vawi 28 zet hnehna an chang thei a ni.

Napoli an lian

Italy chauh pawh ni lo Europe-a sulhnu neiṭha berte zinga mi AC Milan-in tun hnaiah beisei an phak lo a, tun season an match hmasa berah hnehna chang mah se sulhnu ṭha an neih hleihtheih lohna San Paolo Stadium-ah 4-2 in an tlawm leh ta.

Season hmasa Seria A pa-hnih-na Napoli hian Juve lakah Higuain chan mah se goal khung an harsat phah lo. Ajax striker hlui Arkadiusz Milik leh forward Jose Callejon te chuan goal hnih khungin Milan goal pahnih hi M'Baye Niang leh Suso te khung a ni.

AC Milan hian kum 2010 October thla hnuah San Paolo Stadium-ah hian hnehna an la chang leh miah lo! Vawi li ngawt a chak lo zawhah an ṭanga, ṭum hnih chu an inhnehtawk thung.