2016 MFA Super champion Club dang chunga leng Aizawl FC
Hun tawp hamrik a rik rualin K. Mal-sawmkima'n lawm avangin a kut hum ruhin boruak a hnek a, hnehna aw rawl a chhuah bawk. Aizawl FC leh Mala ten a vawi khat nan MFA Super Cup nomawi an chawi a, final-a an hneh chu Chanmari FC an ni.
Inrinni khan Samsung 3:16 Plan Solu-tion MFA Super Cup final chu Lammual-ah khelh a ni a, goal awm chhun hi Aizawl FC midfielder Zoramthara'n minute 19-naah a khung.
Mala hote hian champion vangin Rs 1,50,000 an dawng a, Fair Play Award aṭangin Rs 10,000 an dawng tel bawk. Aizawl FC captain Rohmingthanga chu best midfielder-ah thlan a ni a, left back Ricky Lallawmawma chu best defender a thlan a ni.
Pahnihna Chanmari FC-in Rs 50,000 an dawng. Final-ah an forward chhuanvawr Malsawmfela langsar lo mah se goal nga khung thei Ramhlun South tlangval hi best forward-ah thlan a ni a, Chanmari FC keeper Lalmuanawma chu best keeper-ah thlan a ni. Mimal lawmman hian Rs 3,000 bakah nomawi a keng tel.
Tualchhung football club ṭha pahnih hi vawi 18 an intawng tawh a, Chanmari FC hi vawi ruk an chak tawh. Aizawl FC erawh MFA Super Cup final-a an chak leh takah chuan Chanmari chak let chak turin vawi khat chak chiah an mamawh tawh.
Inkhel an ṭan ta
Tlai dar 2-ah final khelh a ni a, khaw ṭha hnuaia khelh a nih avangin boruak a lum hle. Chanmari FC player-te a tirah nung ṭha viau mah se minute 90 an daih lo a, forward Sawmfela'n inkhelh
ṭantirh lama Aizawl FC tlar hnung vawi hnih khat a rum ṭhaih bak chu Lalramchullova leh Lalruatthara-te lakah a thamral chiang hle.
Chanmari FC-in khaw awm dan ngaih-tuah loin warm up an la a ni thei a, final boruak an zo loah a ngaih theih bawk. Lalsangzuala Hmar hoten inkhel bul an
ṭan ṭha hret nachungin minute 19-na leka an goal chhuahin a beng harh zo lo a, hun tawp lamah ball chang tura an huamhauh tawk loh avangin final-ah chak phu zawk an chak.
Midfielder an awm em?
Chanmari FC-in tualchhung midfielder ṭha an sawi apianga a hming an lam tel ṭhin Reuben Zosangpuia an kawl a, MPL2 best midfielder hi inhliam (?) vangin squad-ah telh a ni lo. Midfield laiah Lalrinchhana leh R. Malsawmtluanga ten inkhel bul an ṭan a, tun season bikah chuan inkawp fuh berte zinga mite an ni.
Amaherawhchu darkar chanve a ral awrh tihin Rinchhana thlak a ngai a, semifinal-a Mizoram Police an hneh ṭuma khel ṭha defender C. Lalrosanga dah luh niin captain Lalrinchhana nena defence laia inkawp C. Lalmuanawma chu MS-a nen midfield-ah inkawptir an ni.
Chanmari FC midfield-in ngai a awh tawh lo a, bench-a ṭhu Chanmari midfielder Rochhingpuia a luh loh vangin zawhna a awm nghal. Result-in a zir miau loh avangin, 'Engvangin nge Rosanga'n inkhel bul a
ṭan loh?' tih pawh Chanmari enkawltute tan chuan zawhna chhan harsa tak a ni ngei ang.
Mends leh Goal
Aizawl FC-in tlar hma tichak turin Bright Middleton Mends an lalut a, Ghanaian striker hian final-ah a tlan chakzia bak lantir a nei tam lo. Third division club Bungkawn FC lama goal hnih a khung hnuah Mends-a'n goal a khung chhunzawm lo.
Darkar khat pelh hretah Mends hi in-hliam vangin Vanlalduatsanga'n a thlak a, inkhelh banah coach Mala chuan, "Mends kha a inhliam avangin kan hlauhthawn phah lo a, goal a khung theih loh avang khan a khelh dan kha hmuh hrehawm ka ti. Chuvangin Ghanaian striker aia Duata ka luhtir khan ngaih a ṭha zawk," tiin MPL-a champion tur chuan striker ṭha zawk an mamawh thu Vanglaini palai a hrilh.
AFC bang rinawm
Aizawl FC champion theihna chhan chu an defender-te an ni a, MFA Super Cup-ah goal an chhuah lo.
Hei chauh hi a ni lo, semifinal-a Chawnpui FC an hneh ṭuma goal awm chhun khungtu chu right back Lalrinzuala Khiangte a ni. Quarterfinal-a BVT an hneh ṭum pawhin penalty hmasa ber pettu chu defender Chullova niin a tawp khartu chu Rinzuala a ni a, tlar hnung player-te hi Aizawl FC innghahna kan ti lo thei lo.
Best goalkeeper chawimawina AFC-in an dawng lo a, hei erawh keeper ṭha pahnih Lalawmpuia leh Zothanmawia te an neih vanga a ngaih theih. Keeper pahnih hian match li an khelhah vawi hnih ve ve an inlan a, goal an chhuah lo.
Best midfielder dawngtu Rohming-thanga'n Bungkawn FC an hneh ṭumin goal khung bawk mah se tlar hnung a puih thiam vangin Super Cup-ah a langsar a, hei hi mimal chawimawina a dawn chhanah a ngaih theih.
Best defender Ricky-a hming lam hmaih a thiang lo. Ṭawng tam hmel pu lo mah se ṭhiante huikhawm thiam ta, Ricky-a tel lo hian I Day Football-ah Aizawl FC-in Chanmari FC 1-2 in an hneh lo. MFA Super Cup final-ah erawh left back Ricky-a a awm tawh a, Aizawl FC an chak.
Mala malsawmna
Aizawl FC enkawltu K. Malsawmkima hi MPL1-a FC Kulikawn in an ban kha a ni a, MPL2-a Luangmual FC final thlenpuitu kha a ni bawk. Aizawl FC a enkawl ṭantirhin I Day Football final-ah Dinthar FC an hneh lo.
Amaherawhchu Mala hnuaiah Aizawl FC-in champion zia an nei chho a, MPL3 an champion hnuah Mizo club zinga a hmasa ber ni turin I League-ah an inpetling. Kum 2015-ah an indinthar leh hnua a vawi khat nan Aizawl FC-in Mala hoin I Day Football-ah an champion a, I League an khelh dawn avangin Spanish coach Manuel Retamero-a'n a hmun rawn luah lanin MFA Super Cup-ah tun ṭuma Chanmari coach Lalsangzuala Hmar enkawl Bethlehem Vengthlang FC an hneh lo.
Tun season ṭan tirhah Mala thuhnuaiah Aizawl FC dah leh a ni a, I Day Football leh MFA Super Cup-ah an champion. Player ṭha awm khawm enkawl chuan champion a awlsam ngei ang, amaherawhchu Mala awm hma hian Aizawl FC hian inelna lian thamah nomawi an la chawi ngai lo - coach Mala hnathawh hi dahhniam theih a ni lo.
Aizawl FC coach Mala chuan, "Team dang pawhin chak loh chu an duh lo a, ka player-te hian team dang zawng aiin chak loh an hreh bik a ni. Ka player-te thawhrah a ni a, club chhung inlungrualna zarah tun dinhmun thleng thei hi kan ni. MFA Super Cup hi ka la champion ngai loh a nih avangin ka ngai pawimawh em em a, tunah chuan ka chawi ta reng mai. Ka lawm takzet a ni," tiin Vanglaini palai a hrilh.
Player intluk tlangah 'team spirit' nei ṭha zawk an chak a tih theih - khelmual chhungah Chanmari FC player inhau hmuh tur an awm reng a, bench aṭanga control-tu awm lo ang mai an ni. Aizawl FC erawh an ṭang a, theihtawp an chhuah - hei hi team pahnih danglamna lian tak niin a lang.
MFA SUPER CUP
2013 - 4TH OCTOBER
Chanmari FC 3 - 1 Dinthar FC
CFC : K.Lalchhanhima 29',59' ; Lalruatfela 75'
DFC : Lalnunmawia 38'
2014 - 29TH AUGUST
Chanmari FC 3 - 2 Dinthar FC
CFC : Lalrinchhana 2'; Vanlalpeka 8' (OG); Lalruatfela Zote 61'
DFC : Johny Lalfakzuala 39', 69'
2015 - 4TH SEPTEMBER
Bethlehem VT 2 - 1 Aizawl FC
BVT : MS Dawngliana 43'; Laldingngheta 86'
AFC : Michael Lalremruata 57'
2016 - 27TH AUGUST
Chanmari FC 0 - 1 Aizawl FC
AFC : Zoramthara 19'
* MFA Super Cup hi kumin aṭangin khelh dan hmang thlak a ni a, tualchhung football a duh apiang tan tel theih niin kuminah hian MPL club pariat bakah District FA hnuaia club 48 an tel.
CHAMPION KALKAWNG
LAST 16
Aizawl FC 3 - 0 Bungkawn FC
AFC : Bright Middleton Mends 60', 90+1'; Rohmingthanga 88'
QUARTERFINAL
Aizawl FC 0 - 0 Bethlehem VT
Penalty Shootout-ah AFC 4-1 in an chak
SEMIFINAL
Aizawl FC 1 - 0 Chawnpui FC
AFC : Lalrinzuala 68'
FINAL
Chanmari FC 0 - 1 Aizawl FC
AFC : Zoramthara 19'
Inelna Thlirna Tawi
Champion Aizawl FC
Runners Up Chanmari FC
Fair Play Award Aizawl FC
Best Goalkeeper Lalmuanawma, Chanmari FC
Best Defender Ricky Lallawmawma, Aizawl FC
Best Midfielder Rohmingthanga, Aizawl FC
Best Forward Malsawmfela, Chanmari FC