A hunah tak Rashford

Chelsea-in Antonio Conte hnuaiah hma an sawn tih hai rual a ni lo, Liverpool hneh loh Premier League kai thar Burnley 3-0 in an sawp. Jose Mourinho hnuaiah Manchester United-in rilru huaisena an nei let a, injury time-a substitute Marcus Rashford goal hmangin Hull City an hneh.

Match thum khelh tawhah Blues leh United te an la chak vek a, ram inkhelh a awm dawn avangin Premier League a awm rih dawn lo. A awm leh hunah erawh a hma zawng aiin a hmuhnawm dawn emaw tih mai tur a ni - September 10-ah Manchester Derby a awm nghal dawn.

Hazard a vul

Stamford Bridge-ah Eden Hazard-a'n minute 9-na lekah halfway line pelh hret aṭangin a khalh tlang a, goal ropui a khung. Chelsea-in goal an khung hma avangin harsatna an nei lo a, Brazilian midfielder Willian (44') leh substitute Victor Moses (89') ten goal khat ve ve khung belhin 3-0 in hnehna an chang.

Season hnih liam taa Chelsea-in Premier League nomawi an chawi khan Hazard chu hnial rual loha player ṭha ber a ni a, goal 14 leh assist vawi kua neiin player of the year a ni. Nikumah erawh Jose Mourinho enkawl Chelsea an chuai a, mawhphurhtu zingah Hazard chu hming langsar a ni.

Belgian winger hian Antonio Conte hnuaia league match vawi thum a khelh tawhah goal hnih a khung a, Burnley an hmachhawn ṭum pawh hian full-back Matt Lawton tan harsatna a siam tluan chhuak zak.

Chelsea boss Antonio Conte chuan, "Kan team khelh ṭhat avang leh chance kan insiam hnem avangin ka lawm hle a ni. A pawimawh lai chu, Stamford Brigde-a match hnuhnung 13 zawhah goal kan chhuah lo. Tuna ka player-te nena thawhho hi nuam ka ti a, chutihrualin kan duh tak kan hmuh chuan squad tih chak chu ka duh," tiin player an la zawn zel thu a sawi.

Italian manager Conte hian goal hmahruai khungtu Hazard a fak a, khel ṭha zel turin thawhrim a mamawh thu a sawi bawk. Blues hian September 11-ah Swansea an hmachhawn ang a, hemi hma ni hian Burnley-in Manchester United laka chak lo Hull City an mikhual thung ang.

Mourinho time

Manchester United-in Sir Alex Ferguson hnuaia injury time-a goal an khung theih avangin hun pek belh chu 'Fergie Time' tih a ni ṭhin. Tunah Jose Mourinho hun a inṭan a, 2011-12 season hnua a vawi khat nan United-in season ṭantirh match hmasa pathumah hnehna an chang - Hull City laka goal awmchhun hi injury time-a lut a ni.

Hull City senior player Harry Maguire a dam a, Mike Phelan chhawr theih turin Premier League kai thar hian senior player 14 chauh an la nei tho. Amaherawhchu Tigers hian an match hmasa bera champion lai Leicester City an hneh hnuah Swansea City an hneh leh tawh a, Manchester United lakah pawh goal venhim chu an thupui ber a ni.

Tigers hian khawvel player manto ber Paul Pogba, Ligue 1 top scorer Zlatan Ibrahimovic leh Bundesliga player of the season Henrikh Mkhitaryan te an dang thei a, Manchester rawlthar Rashford erawh an dang thei lo. Captain Wayne Rooney thawhrah sengin Rashford hian injury time-ah chakna goal a khung a, kum 18-a upa forward hi Premier League-a Mourinho hnuaia kum 20 hnuai lam goal khung hmasa ber a ni.

Manchester United manager Jose Mourinho chuan, "Chak kan phu a, kan bei hram hram a, a tawpah goal kan khung ta nge nge. Kan rilru put hmang a dik a, ka naute hi nitinin inkhel apianga chak turin ka fuih. Hull lakah khan ka beisei ang takin an lanchhuahtir a ni. Champion kan duh a, bul ṭan ṭhat hi kan duh ringawt lo - a tawp zawh ṭhat kan duh," tiin a naute a fak.

United hian Hull City lakah goal vawi 29 zet shot a nei a, Tigers tlar hnung an khawng
ṭhat avangin injury time-ah goal khat an khung hram.