MPL5 Kick Off a ni ta

Mizoram Premier League Season 5 chu August 26, Zirtawpni zan khan All India Football Federation vice president Larsing Ming chuan Lal Thanhawla Auditorium, Aizawl-ah a 'Kick Off'. Mi-zoram chhunga foot-ball inelna sang ber hi Sep-tember 1, 2016 hian Lam-mualah khelh ṭan a ni ang.

'McDowell No. 1 Soda Mizoram Premier League Powered by Gionee' Kick Off huna thusawitu Larsing Ming chuan, MPL chu player ṭha tam tak chher chhuaktu a nih thute, India ram football-a TV broadcaster mumal tak nei tlem te zinga mi a nih thu te, Mizoram sorkarin khelmual ṭha tak tak a siam tawh avanga football-a Mizoramin hmabak êng tak a neih thute a sawi a, "Tun hma-a India hmarchhak football-a Manipur an sawi ṭhin kha tunah chuan Mizoram-in a thlak tawh a, Mizoram hian Indian football-ah hmun pawimawh tak a chang a ni," a ti.

Mizoram Football Association hnathawh dan fakin Meghalaya Football Association president ni bawk Larsing Ming chuan, "Tun hnaia AIFF leh FIFA aṭanga duhsakna in dawn zozaite hi in thawh rah liau liau a ni," a ti a; MFA phûrna, inpekna leh thawhrimna chuan football-ah bung thar a keupui nia a hriat thu a sawi bawk.

MFA president Lal Thanzara chuan tluang taka MPL a kal theihna tura tha thawhtute chungah lawmthu a sawi a, "Kan thawhpui Zonet TV chungah kan lawm a, kan thawkho zel dawn a, MPL club hruaitu sum leh pai sengtute chungah lawmthu kan sawi a, player ṭha tak tak thawhtu District football-a kan thawhpuite chungah pawh lawmthu kan sawi a ni," a ti a, sorkarin khelmual ṭha leh zana inkhelh theihna a siamsak avangin lawmthu a sawi bawk.

MFA finance secretary Lalruatsanga Tochhawng kaihhruaiin team captain pariatin thu an tiam a; model-in team jersey pholanna hun an neih bakah MFA honorary secretary Lalnghinglova Hmar-in MPL kal tawh leh khelh dan tur thlirna hun a hmang bawk a ni.