Liverpool-in Jota an lalut

Transfer bazar-a thawm an neih loh reng hnuin Liverpool-in an fan-te an barakhaih a, Spanish midfielder Thiago Alcantara an lakluh hnuah Wolverhampton Wanderers aṭangin forward Diogo Jota an lalut. 

Kum 23 mi forward manah hian Liverpool chuan pound maktaduai 41 an pe dawn a, a khelh ṭhat dan a zirin a man hi pound maktaduai 45 thlenga sang chho thei tura tih a ni bawk. 

Jota hian Reds tana khel tur hian kum nga chhung atan contract a ziak a, a man hi tam viau avangin lang mah se Liverpool defender Ki-Jana Hoever chuan Wolves hi a zawm ve bawk avangin Jota hi pound maktaduai 30 man vel ang a ni. 

Kum 18 mi Ki-Jana Hoever hian Wolves-ah hian kum nga chhung atan contract a ziak a, a man zat hi pound maktaduai kua niin a khelh ṭhat dan a zira pound maktaduai 4.5 pek belh tur a ni - Wolves hian Hoever hi an hralh a nih chuan Liverpool hian a man aṭangin 15% an tel bawk ang. 

Jota chuan, "Premier League thlir chuan Liverpool hi England-a team lian ber angin a en loh theih loh a, anni hnar hi chu thil theih a ni lo a ni," a ti. 

Portugal tana vawi li inlan tawh Jota hian season hmasa khan Wolves tan inelna hrang hrangah match 48 khelin goal 16 a khung a, assist vawi ruk a nei bawk - heng zingah hian Europa League-a Besiktas leh Espanyol an hmachhawn ṭuma hattrick a siam chu a tel. 

Reds hian Jota hma hian Alcantara chu Bayern Munich aṭanga an lakluh thu an tichiang bawk a, Spanish midfielder thiam bik hian kum li chhung atan contract a ziak a, a man zat hi pound maktaduai 20 ni mah se pound maktaduai 25 thlenga sang chho thei tur a ni. 

Anfield-a jersey number 6 ha tur Alcantara man hi instalment-a pek tur a ni a, Premier League leh Champions League-a Liverpool chet dan piahlamah a mimal chet ṭhat dan a zirin pound maktaduai nga pek belh leh tur a ni. 

Bayern-in treble champion dinhmun an luah theih nana player pawimawh Alcantara chuan, "Ka hlim takzet. He hun thleng tur hian rei tak ka lo nghak tawh a, he hmun ka pan thei hi ka lawm hle a ni," tiin 

a sawi.