Kum 12 hnuah Santos tan Neymar a inlan

Nimin zing khan Neymar chuan Santos kawr hain a lar chhuahna hmun Estádio Urbano Caldeira-ah a inlan leh ta a, inkhel ṭan hma aṭang hauhin Brazil forward hian boruak a nei lian hle.

Santos hian inkhel thununin first half-ah Tiquinho Soares-a penalty hmangin 1-0 in hma hruai mah se Botafogo-in Alexandre de Jesus hmangin second half-ah siphurh an sut. Mikhual team right back Wallison chu hnawhchhuah zui ni mah se Neymar-a telna Santos-in goal an khung belh thei lo a, 1-1 in inkhel a tawp.

Neymar hian inkhel bul a ṭan lo a, bench pana a phei lai aṭangin mipui mit fukna a ni nghal. Kum 33 mi Neymar hian kum 2013 khan Santos aṭangin Barcelona a pan a, hemi hnu hian PSG leh Al Hilal tan khelin Saudi club aṭangin a larchhuahna hmunah hian a kir.

Player ropui bik Neymar hi second half ṭan chiahah a lut a, Santos captain Diego Pituca chuan armband a lo pe nghal a, Santos jersey no. 10 nena lut player hian ball pawh a khawih hma hauhin legend a nihzia a nemnghet nghal.

Hliam vanga Al Hilal tana khel tam lo Neymar-a'n a thiam thil a theihnghilh lo a, tun hma ang thoin a la hmuhnawm reng. Mahse, Neymar a telna Santos-in a tawp an khar ṭha tawk lo a, corner kick aṭanga goal an venhim loh avangin 1-1 in inkhel a tawp thung.

Inkhelh banah Neymar chuan, "Santos hi ka hmangaih. Khelmual ka rap leh chiaha ka tawn dan kha thuin ka sawifiah thiam lo," tiin a ngaihhlutzia a sawi.

Brazilian forward chuan sawi chhunzawmin, "Inkhelh tam ka mamawh a, 100% in ngai ka la awh lo. Ka tlan tam thei lo a, ball pawh khalh ka la harsat. Match nga hnuah chuan ngai ka awh theih tawh ka ring," tiin a sawi.

Neymar hian Santos tana a khelh laiin nomawi paruk a chawipui hman a, kum 2011 khan Copa Libertadores-ah a champion pui. Kum 21 a nih thleng chauh Santos tan khel mah se match 225 khelhsak hmanin goal 136 a khung hman a ni.