Mizo boxer pahnih an inlan dawn

Vawiin chhun dar 12:00 hian Bangkok-ah Super Fight Series neih a ni dawn, he hunah hian Mizo professional boxer pahnih Laldinsanga leh Vanlalawmpuia te an inlan dawn, inhnek hi Crown Boxing Promotion youtube channel-ah live a ni ang.

WBC Youth World title (Bantamweight) kawl mektu Laldinsanga chuan Thailand boxer Sarawut Jiamthong a hmachhawn ang a, round riat chhung inhnek tura ruahman an ni.

Ramthar, Lunglei tlangval Dinsanga hian tualchhung inelna lian LPS Pro Fight lamah hming a chher tawh a, chumi hnuah khawvel hriat hlawh turin a vak chhuak, tunah chuan a hming chher belh theihna remchang a nei dawn.

Mizo boxing coach Sete Renthlei chuan, "Dinsanga hi a inbuatsaihna a ṭha em em a, ani ang bawkin Awp-a pawn a inbuatsaih ṭha bawk. An pahnih hian round riat inhnek tura tih an ni a, mahse a tawp thleng an inhnek a ngaih ka ring lo," tiin Vanglaini a hrilh a, a naute chu chak ngei turin a ringtawk hle.

Tualchhunga hriat hlawh tawh pakhat Vanlalawmpuia chuan Supachat Sukonthamanee a hmachhawn dawn a, ram pawnah pawh tawnhriat a neih ṭhat tawh avangin atan Thai boxer hi khingpui harsa tak a ni lo tura ngaih a ni.