Bayern an hrâng, a chelh thei tur Dortmund?

Germany rama football inelna sang ber Bundesliga chu Zirtawpni khan khelh ṭan a ni a, champion lai Bayern Munich-in Schalke 8-0 zetin an sawp. Hansi Flick-a hote hi treble champion zo hlim a nih avangin champion nawn tura rinkai lawrlak ni mah se Borussia Dortmund-in nomawi chhuhsak ngei an tum.

Inrinni zan inkhelah Borussia Dortmund-in Borussia Moncheng-ladbach 3-0 in an sawp ve bawk a, Erling Braut Halaand-a'n goal hnih nen season bul a ṭan a, BVB hi Bavarians el thei ber tura ngaih an ni. 

Europe league sang panga chinah hi chuan 8-0 a insawp hi thil thleng zen zen a ni lo a, amaherawhchu Bayern Munich an nih miau avangin ngaia neih a awl chho dawn. Bavarians hian Champions League quarterfinal-ah Europe club ṭha Barcelona 8-2 in an sawp a, Schalke 8-0 zeta an sawp hi a mak ta lo.

Goal lut zat hian Bavarians-in inkhel an thununzia a sawifiah a, hetianga inkhel thunun tur hian player class sang a pawimawh. Serge Gnabry-a'n minute lina lekah box chhung chiahah ball changin a inherpui a, a ke vei lamin a pet goal.

Arsenal forward hlui Gnabry hian hattrick a siam a, minute 47-na leh 59-naah Leroy Sane-a thawhrah a seng. Schalke-in Sane ringawt pawh ven an harsat a, Gnabry veng leh tur an awm lo a ni ber.

Gnabry hattrick siam inkarah hian Leon Goretzka-a'n box pawn aṭang chiahin a khung a, season liam ta top scorer Robert Lewandowski-a'n penalty aṭangin tun season 'account' a hawng.

Goal nga a luh hian minute 59 chauh a la ni a, Bayern an la phur ṭan chauh. Lewy-a'n rabona kick hmangin Thomas Muller a siamsak a, minute 69-naah 6-0 a ni. Man City aṭanga Bavarians zawmtu Sane-a'n a club hlui lakah goal a khung a, Germany international hian 100% fitness a la nei lo chungin a tlan chak lai berin 34.8 km/hr in a tlan thei a, inkhela player tlan chak ber a ni.

A tawp khartu a  'cial' viau, kum 17 leh ni 205 mi Jamal Musiala-a'n ama pualin goal khat a sual chhuak a, Rogue Santa Cruz record khumin Bundesliga-a goal khung thei naupang ber a ni. Musiala hi Chelsea youth system chhuak a ni a, kum 16 a nihin Bayern a zawm. Germany-a piang ni mah se naupan laiin England-ah an insawn avangin England leh Germany tan a khel thei a, youth team-ah chuan ram pahnih tan khel tawhin tunah hian England Under 17 tan a khel mek.

Borussia Dortmund-in naupang beiseiawm an ngah a, German club-ah hian theihna sang tak a awm. Inrinni zan Dortmund leh Gladbach inkhelah Jude Bellingham-a'n inkhel bul a ṭan nghal a, English rawlthar hian Gio Reyna goal khung tur a siamsak. Minute 35-naah Reyna hian Dortmund goal hmahruai a khung a, Bundesliga-a a goal hmasa ber a ni.

Gio Reyna hian second half-ah penalty a hlawh chhuak a, referee-in penalty pe lo zet mah se VAR hmanga a en let hnuah thutlukna a sut. Minute 54-naah Erling Braut Halaand-a'n keeper bumin penalty hi goal-ah a chantir a, Dortmund striker hian Jadon Sancho ball pek chu minute 77-naah a pet goal leh bawk.

Dortmund-in Champions League khelh inbeisei zinga mi Gladbach 3-0 in an sawp thei a, Bayern Munich an el thei dawn tih a hriat. Chu chauh chu a ni lo, Norwegian striker Haaland hian goal khung tam kawngah Robert Lewandowski a elpha bawk ang.