Serie A an khel ṭan ta

Inrinni zan khan Italian Serie A 2020-21 season chu khelh ṭan a ni a, match hmasa berah Fiorentina chuan an mikhual Torino chu 1-0 in an hneh. Goal awmchhun hi Gaetano Castrovilli-a'n minute 78-naa a khung a ni.

Covid-19 vangin Serie A hi a hmunah entu an awm lo, manager thar Marco Giampaolo-a'n a naute remphui viau mah se vawi khat an chetsual zauh avangin an lamah goal a lut a, a chhanletna tur an nei lo.

Mikhual Torino hian hun tawp hma deuhin Andrea Belotti hmangin an si phurh sutah an inngai, amaherawhchu offside vangin he goal hi pawmsak a ni lo a, mualneitu lamin point thum hlu tak an hlawh chhuak.

Inkhel dangah chak tura rinkai AS Roma chu an mikhualna ramah Verona nen goal khung loin an inhnehtawk. Roma hian an striker duhlai Edin Dzeko chu Juventus lakah an chan dawn niin a lang a, bench lamah hun hmantir a ni.

Bosnia international Dzeko tel lo chuan an tlarhma a hriam tawk lo. Dzeko hmunruak luah tur an zawn a ngai dawn a, Italian media-te chuan Roma hian Napoli aṭangin Arkadiusz Milik an lalut dawn niin an tarlang.