La Liga Barca chakna goal khungtu Rakitic
La Liga champion Barce-lona-in Lionel Messi leh Luis Suarez kawl mah se Athletic Bilbao laka hnehna chang turin midfielder Ivan Rakitic an mamawh. Croatia international hian minute 21-naah he inkhela goal awmchhun hi a khung a, veilam sir aṭanga Arda Turan ball cross chu tauh lutin 1-0 in Catalan club hnehna a chanpui.
Barca keeper Marc-Andre ter Stegen ball pass sual chu Spanish midfielder Benat Etxebarria-a'n chhawr ṭangkai thei lo a, German keeper Ter Stegen a mualpho lo hlauh. Athletic Bilbao hun
ṭha neih Raul Garcia leh Inaki Williams ten an chhawr thei lo chu Catalan club vanneihna belhchhahtu a ni. Messi khelh
ṭhat loh niah Barcelona-in point thum hlu tak an hlawh chhuak.
Goal khung harsat Barca!
Barcelona-in goal khung an harsat thu sawi hi thil inhmeh lo ber pawl a ni hial ang - mah se an league match hmasa bera goal ruk khungtu team hi
ṭum dang angin goal hmaah an vannei tawk lo a, Bilbao lakah goal khat chiah an khung thei.
Neymar tel loa khel Barca tan Arda Turan langsar mah se Turkey international hian yard 8 vel leka hla aṭanga a hun ṭha neih a khawhral avangin a hming-
ṭhatna tur a hlawh chhuak zo lo.
Ṭum dang ang thoin Messi thiamna hmuh hmaih theih a ni lo a, Argentine forward hian a dan pangngaia defender pahnih mawi taka a bum hnuah goal khungna hun ṭha nei mah se a vanneih loh ṭum a ni - hemi hnu lawk hian crossbar chungah a pet bawk.
Barca tlar hmaah Luis Suarez hlauhawm viau mah se goal a khung thei bik lo a, hun pek belha Uruguayan striker goal shot hi Athletic defender Eneko Boveda chuan line aṭangin a pet chhuak hman.
Enrique 100
May, 2014-ah Luis Enrique-a'n Barcelona a enkawl ṭan a, Pathianni zana hnehna an chan hi a season hmasa bera treble champion a nihpui club vawi 100 a chakpuina chiah a ni - Spanish coach hian 'century' chak hmel hmu turin match 126 chiah a mamawh.
Kum 46-a upa manager chuan an inkhel chungchang sawiin, "Team ṭha tak kan hmachhawn avangin kan result-ah hian ka lawm a, he result hian tun aia ṭha lehzuala khel turin min pui dawn a ni. Season hmasa khan a tir a-
ṭanga hmahruaitu nih nghal kan duh a, chu kan duhna thinlung chu a la danglam lo," tiin a naute khelh danah a lawm hle.
Hmahruaitu Las Palmas!
Season hmasa khan Las Palmas-in playoff chhawr ṭang-kaiin La Liga an khel a, an season hmasa berah 11-na dinhmun luah nghalin tlak hlauhawmah an awm lo. Hetichung hian tun season-ah Las Palmas lakah beiseina a sang lo - mah se, Spain international hlui Quique Setien-a naute hian league match hnih an khelh tawhah goal kua an khung ta der!
Las Palmas hian Pathianni zan inkhel dangah Granada chu 5-1 zetin an sawp a, Nabil El Zhar chuan goal hnih a khung bakah Kevin-Prince Boateng, Momo leh Sergio Araujo ten goal khat ṭheuh an khung bawk a, Granada tana Jeremie Boga goal khung chu an mualpho zualpui khuhtu mai a ni.
AC Milan aṭanga Spanish club zawmtu midfielder Kevin-Prince Boateng-a'n a club thar tan match hnihah goal hnih a khung ta a, an league match hmasa bera Valencia 4-2 a an sawp ṭumin goal a lo khung tawh bawk.