Fabregas leh Conte an buai lo

Chelsea midfielder Cesc Fa-bregas chuan manager thar Antonio Conte nen inhmuthiam lo anga an sawi chu phain Stamford Bridge chhuahsan tumna a neih loh thu a sawi.

Kum 29-a upa midfielder hian Conte hnuaiah hmun pawimawh a chang phak meuh lo a, an league match hnuhnung bera Burnley 3-0 a an hneh ṭumin bench-ah hun hmang tluanin Italian manager hian chhuahtir a hnial lo niin khawthlang media te chuan an tarlang.

Mahse, Arsenal midfielder hlui chuan, "Conte hian ka chhuah theih thu min la hrilh miah lo a, keiman ka rintawk ang bawka min rin thu min hrilh zawk a ni. He club tan hian a tawp thlenga theihtawp chhuah ka duh a, inkhel tura koh ka nih hunah ka theihna zawng zawng nen ka khel zel ang," a ti.

Barcelona aṭanga Chelsea pantu midfielder hian a la duhtawk mai lo, "Chelsea-ah hian ka hmalam hun zawng zawng ka nghat a, tuna ka thil tum awmchhun chu he club-in nomawi tam zawk a chawi theih nana puih zel hi a ni," tiin chhuah a tum hmel loh hle.

Stamford Bridge-ah hmun pawimawh a chan phak loh avangin Spanish midfielder hi World Cup qualifier leh friendly match an khelh turah Spain coach thar Julen Lopetegui chuan a ko lo a, hetiang a nih reng chuan Blues tan a rinawm reng theiin a rinawm loh.