Belgium-ah Rosberg a chungnung

Pathianni zan khan Formula 1 Belgian Grand Prix tlan niin Mercedes driver Nico Rosberg chu pakhatna a ni. World cham-pion Lewis Hamilton erawh pakhatna a nih kaltluang lai a tawp a, pathumna a ni hram.

Kum 31-a upa Rosberg hian season ṭantirh khan intlansiak paliah ngawt a zawnin hnehna a chang thei a, tun hnai intlansiak hnuhnung pangaah erawh Hamilton a chungnung vek thung.

Belgium-ah thil a danglam ta, a zawna a vawi thum nan Rosberg hian pole position aṭanga bulṭanin lap 44 tlan a nih chhung zawngin a chungnung tluan zak - he tlankawngah hian tun ṭum hi hnehna a chan vawi khatna a ni.

British driver Hamilton-a'n hrem a tawrh avangin 21-na aṭangin intlansiak bul ṭan mah se a huaisen leh car khalh thiamzia lantirin pathumna a ni phak tho! World champion vawi li ni tawh Sebastian Vettel leh a teammate Kimi Raikkonen te kawng kawi hmasa berah an intai palh avangin beisei an phak lo a, Vettel hi paruknaah a thleng.

Tun season intlansiak vawi 13 awm tawh aṭangin Hamilton-a'n point 232 hmuin driver championship-ah hma a hruai zel a, amah hnaih bertu Rosberg nena an inthlauhna erawh point kua chiah a ni thung. Kuminah intlansiak hmabak pariat chauh a awm tawh a, September 4 khian Ita-lian Grand Prix an tlan leh ang.

Rosberg chuan, "Daniel khan a bul aṭanga a tawp thlengin min hlat lo a, beisei phak baka ṭhain Lewis a rawn tlan bawk. Tun hma lama result ṭha ka la neih ngai lohna hmuna hnehna ka chang ta hi ka lawm hle - intlansiak ngaihnawm, harsa leh hautak tak chu a ni," tiin a sawi.

Point a hmuh vanga a lawm-thu sawiin Hamilton chuan, "Kartluanin engtiangin nge point ka hlawh chhuah theih ang tih ka ngaihtuaha, a channa ka hmu ta. Mi tam takin a hnunglama thlenga tura min ngaih laia podium-a ka lawn thei hi ka lawm takzet, ka tlan dan kha ka en let a, ka chhunag hle," a ti.