Inter Milan leh Roma chak zo lo

Pathianni zan Italian Serie A inkhelah Inter Milan leh AS Roma te chuan an khingpui ve ve an inhnehtawkpui a, point khat an hlawh chhuak.

San Siro-a inkhelah manager thar Frank de Boer-a nauten Paler-mo lakah goal an chhuah hmasa a, first half-a goal a luh loh hnuah defender Andrea Rispoli chuan minute 48-naah he inkhela goal hmasa ber a khung.

Inter hi an league match hmasa zawkah Chievo laka 2-0 a an tlawm tawh avangin mualpho nawn tura ngaih an ni hman. Amaherawhchu, tun hma lama a team te lo chhanhim fo tawhtu Mauro Icardi chuan minute 72-naah an siphurh sutin tun season-a an point hmasa ber an hlawh chhuak.

Inter coach Frank de Boer chuan, "Karhmasa ai chuan hma kan sawn hle tih a lang a, kan vanneih ni chu ni se 4-1 a chak thei turah ka inngai. Tunah chuan duhthu la sam rih lo mah ila nakin lawkah point thum kan la hmuh ngei ka beisei. Vawiina kan result-ah hi chuan kan zavaiin kan lawm lo," tiin a sawi.

Inkhel dangah Champions League playoff aṭanga Porto-in an pet chhuah hlim AS Roma chuan goal hnih an khung an hum zo lo a, Cagliari nen 2-2 a inhnehtawkin match hnih khelh aṭangin point li an hmu.