West Brom leh Boro inhnehtawk

Premier League kaithar Middles-brough-in league match vawi thum an khelh tawhah chak loh an la nei lo. Pathianni zan khan West Brom nen goal lut loin an inhnehtawk.

He inkhelah hian West Brom left back Brendan Galloway chuan goal khung theihna hun ṭha ber tia sawi ngam chu first half-ah nei mah se Boro goalkeeper Brad Guzan a paltlang zo lo a, Craig Dawson-a ball tauh ṭha tak pawh goal hrulah a liam thlawn. Boro tan Cristhian Stuani-a'n angle zim tak aṭangin goal khung tum mah se Ben Foster-a'n a lo dan sak bawk.

Kum 2015 January thlaa Tony Pulis-a'n West Brom a enkawl
aṭangin Premier League-ah clean sheet vawi 23 an nei tawh a, Arsenal (27) leh Manchester United (25) te chiah tluk loh an nei.

West Brom boss Tony Pulis chuan, "Tuna ka player neih lai 14/15 vel hi chu kum hnih liam ta ami te kha an ni a, anni nen hian relegation battle kan lo hmachhawn tawh. Team ṭha zawk din tur chuan player 5 vel kan mamawh a, indin thar a ṭul," a ti.

West Brom hian tun nipui chhungin QPR aṭangin Matt Phillips chu a nghetin an lalut tawh a, defender Galloway chu Everton aṭangin loan hmangin an hawh mek bawk - player dang lakluh an la nei lo.

Middlesbrough boss Aitor Karanka chuan, "Team pahnih tan inkhelh awlsam a ni lo a, league harsa tak a nih avangin point kan hmu erawh a hlu hle," tiin a sawi ve bawk.