Emery enkawl PSG an chak lo

French Ligue 1 champion Paris St-Germain chu an manager thar Unai Emery enkawlna hnuaiah a vawi khat nan an tlawm. Pathianni zan inkhelah PSG hi Monaco lakah 3-1 in an chak lo a ni.

Monaco tan Joao Moutinho chuan goal hmahruai khungin PSG defender David Luiz-a penalty chawi chu Fabinho-a'n goal-ah chantirin 2-0 in hma an hruai. Manchester United-in an ngaihven nia sawi Fabinho hian tun season league match vawi hnih a khelhah goal hnih a khung der tawh.

Brazil international Luiz hian league match a khelh hnuhnung pakuaah penalty ṭum hnih a chawi tawh. Edinson Cavani chuan goal khat khungin PSG beiseina siam thar ve leh mah se defender Serge Aurier-a'n an lama a tih luh leh avangin Monaco an chak chiang.

PSG-in league chauh ni loin Europe-a champion an duh a, ma-nager Laurent Blanc banin season thum chhung Europe League-a Sevilla champion puitu Emery an lalut - beisei angin thil a kal tluang nghal vek bik lo. Nikum March thla hnua legaue match bika hneh loh tawng loa an kaltluang lai record ṭha tak chu Spanish manager kaihhruaina hnuaiah an chhawm nung thei ta lo.

Kan tho leh ang

PSG manager Emery chuan, "Goal khung theihna hun ṭha
ṭum hnih kan hlah a, anni lamin an rawn khung nghal mai si. 2-1 a nih hnuah khan point hmu thei tur khawpin kan khel ṭha tawk lo a, tihsual kan ngahin ball kan hloh nasa hle," tiin an khelh dana a lungawi loh thu a sawi.

Emery chuan sawi chhun-zawmin, "He result hian hun lokal lehzel tur atan zirlai ṭha tak min pe a ni. Vawi khat kan chetsual avanga hnual mai tur kan ni lo a, ropui zawkin kan kir leh ang," tiin a sawi.