Pep-a hnuaiah Manchester khawpui thar

Manchester City-in 100% chak record an chhawm nung chho zel a, Pathianni zan khan Eithad Stadium-ah West Ham 3-1 in an hneh.

Pep Guardiola hote hian Antonio Conte leh Jose Mou-rin-ho kaihhruai Chelsea leh Manchester United te nen point inang hmu mah se goal difference an neih ṭhat ber avangin Premier League hmahruaitu an ni.

Raheem Sterling-a'n minu-te sarihna lekah City goal hmahruai a khung a, Fernandinho-a'n minute 12 hnuah goal hnihna khung belhin West Ham-in minute 58-naa Michail Antonio tauh luh hmangin bei-seina thar nei mah se, pound maktaduai 49 man winger Ster-ling-a'n injury time-ah chak nemnghehna goal a khung.

Hei le, Pep chu

Manchester City hi Manuel Pellegrini pawhin la enkawl se Hammers, Sunderland leh Stoke City te hnehin point kua an hmuh ngei a rinawm a, hei chauh hi ni loin Steaua Bucharest hnehin Champions League group stage an thleng thei tho ang.

Amaherawhchu Chilean manager Pellegrini sulhnu leh Guardiola kut thlak a danglam tih a hmuh theih - City hotuten Spanish manager an thlan chhan chu a takin a lang chho zel.

Bayern Munich leh Barcelona manager hlui hnuaiah City an champion dawn tih theih la ni lo mah se club dang chunga awm tlakin an khelh dan a mawi. League danah minute 90 chhungin point thum chauh a hmuh theih a, Pep-a erawhin point thum bakah City ṭantute hnen aṭangin rinna a hlawh chhuak.

Etihad Stadium...

Ṭan phat aṭangin City pla-yer-te an nung ṭha em em a, rang taka ball an inpek kual bakah ball an chan lohin West Ham player-te an hual nghal zel avangin Hammers-in chet ngaihna an hre lo.

Sergio Aguero leh David Silva te ball petin goal chhung a luh lohna chu feet khat bak a ni lo. Hemi hnu hian Silva leh Nolito te thawhrah sengin yard riat lek aṭangin Sterling-a'n a thiamna a pholang. City-in inkhel an thunun em avangin goal a lut leh dawn tih a chiang a, thilmak erawh goal dang lut leh turin minute 12 lai mamawh a ni.

Sterling freekick hlawh-chhuah chu Kevin de Bryune-a'n petin Fernandinho-a'n a tauh lut chiang hle. Belgian midfielder hian goal thumna khung theihna tur hun ṭha vawi hnih a nei leh a, freekick aṭanga crossbar a pet per bakah a ke vei lama a ball pet chu goal sirah chiah a kal.

Second half-ah pawh City an danglam lo a, amaherawhchu vei lam aṭanga Arthur Masuaku cross chu Antonio-a'n a tauh luh avangin Hammers an phur thar. West Ham-in goal an khung lai vel hian Pep-a'n inhliam John Stones aiah Aleksandar Kolarov luhtir a tum lai a ni a, an insiamrem hmaa City-in goal an chhuah avangin Spa-nish manager a lungni lo hle.

Season ṭan hmaa rit tur baka rit nia an sawi Samir Nasri pawh minute 75-naah rawn lutin City goal nawr a na sawt. Hun tawp hma hretin French winger ball pek Silva-a'n goal ban pet per nan a hmang a, Spanish midfielder Silva ball pek erawh Sterling-a'n goal hnih khung nan a hmang thung. Liverpool winger hlui hian keeper a bum hnuah angle zim tak aṭangin 'cool' takin a khung a, Manchester City-in point thum an hmuh ṭumah goal thum an khung.

Hammers an fuh lo

Slaven Bilic hoten Europa League khelh theihna hun ṭha an bawhpelh tawh a, an player manto ber Andre Ayew chu inhliam vangin an chan tawh. Hei chauh hi ni loin season liam taa an player pawimawh ber Dimitri Payet chu City an hmachhawn hma ni 13-ah Chelsea nena an inkhelh ṭumin a inlan tawh a, France team-ah pawh koh ni mah se Pathianni zan hian a inlan lo.

Hammers hian tlar hma tichak turin Simone Zaza chu Juventus aṭangin loan-in an hawh a, Italian striker hi an la chhawr hman lo. Tun season-a an pawisa hman zat chu pound maktaduai 60 a tling chho tawh a, an point hmuh zat erawh match thumah point thum chauh a ni.

Eng nge an sawi?

West Ham boss Slaven Bilic chuan, "First half-ah kan khel fuh lo a, halftime-ah player-te huaisen turin ka fuih. Second half-a kan khelh danah erawh ka naute ka chhuang hle a ni," tiin a sawi.

Manchester City manager Pep Guardiola chuan, "Goal an rawn khung chiah khan kan tactic ang ni loin kan rilru put hmang angin kan khel. Inkhel hrim hrimah erawh chance
ṭhahnem tak kan insiam a, kan khel ṭha hle a ni. Ball kan chan lai leh chan loh laiin kan player-te'n a theihna an lantir a, kan khelh danah ka lungawi," tiin a naute a fak.

Manchester derby

Manchester khaw club pa-hnih hian season ṭantirh match thum an chak ve ve chu tun season bakah 2011-12 season chauh kha a la ni a, kum li liam ta khan goal difference hmangin City an champion.

International match awm vangin Premier League chawlh a ni dawn a, an inkhelh leh hunah erawh English club-te inelna sang berah chak vek thei club pahnih chiah an awm tawh ang. A chhan chu Manchester derby a awm dawn avangin United emaw City emaw chuan point an hloh dawn.

September 10, Inrinni khian Old Trafford-ah Pep Guardiola hoten Manchester United an hmachhawn dawn a, tun season-a derby match hmasa ber hian boruak a nei ṭan der tawh. City-in Hammers an hneh ṭumin referee hmuh loh laiin Sergio Aguero-a'n West Ham defender Winston Reid a nghawk lui a, Argentine forward hi hrem theih dinhmunah a ding mek.

Aguero a tel thei lo a nih pawh-in player thar Ilkay Gun-dogan leh Leroy Sane te an dam tawh dawn avangin Hull City laka talbuai Manchester United tan Pep-a hoten harsatna nasa zawk an siam thei tho ang.