Fiji coach tan thilpek dangdai

Rio Olympic neih zawh taka Rugby sevens-a Fiji gold medal lakpuitu, English coach Ben Ryan chu Fiji sorkar chuan acre thuma zau ram a pe a, an ram chawi-mawina sang ber Companion of the Order of Fiji nihna pek a ni bawk.

Fiji tana Olympic medal hmasa ber hlawh chhuah saktu coach hi Rio aṭanga Fiji an thlen hnuin a player-te nen Fiji sorkar chuan £11,250 (Rs. 9,90,286) ṭheuh lawmman atan a lo pe tawh bawk a ni.

Kum 2007-13 chhunga England Rugby sevens coach lo ni tawh Ryan hi kum 43 leka upa a la ni a, Olympic-a ropui taka Fiji a kaihhruai avang hian team enkawl tura sawmna 20 vel a dawng der tawh!