Durand Cup-ah Aizawl FC 3-1 Dempo

India rama football inelna upa ber, Durand Cup-ah nimin khan Aizawl FC-in 3-1 in Dempo SC, Goa an hneh.

Nimina New Delhi-a inkhelah Aizawl FC hian first half-ah Ghanaian striker Bright Middleton Mends goal hnih khung hmangin 2-0 in hma an hruai a, chawlhlawk hman a nih hmain winger Albert Zohmingmawi chu hliam vanga lakchhuah ni mah se Mizo club-in an buai phah lo. Second half-ah Vanlalduatsanga'n Aizawl FC goal thumna khung lehin Dempo hian goal khat khung ve mah se awmzia a nei thui lo a, an mualpho zualpui tur khuhna mai a ni.

Aizawl FC hian I Day Football leh MFA Super Cup-ah goal thun harsat mah se Durand Cup-ah goal thum an khung thei nghal a, inrintawkna nen bul an ṭan. Pathianiah New Delhi thleng chiah mah se an thlen tukah an chak thei nghal a ni.

Aizawl FC hian tun season-ah K. Malsawmkima hoin bul an ṭan ṭha a, I Day Football leh MFA Super Cup-ah an champion. Pathianni khan Durand Cup khel turin Delhi an thleng a, coach Mala erawh chhungkaw lam harsatna avangin a zin ve thei lo. MPL champion hi Technical Director Hmingthana balah tun hnaia AIFF D License course training chhuak assistant coach pahnih - Luangmual FC leh Chanmari FC tan pawha lo khel tawh Lalruatdika leh Chhinga Veng tlangval Jojo-te'n an ho a ni.

Durand Cup vawi 128-naah hian team 12 an tel a, Group A-ah DSK Shivajians, Army Green, Gangtok Himalayan, Indian Navy, Minerva Academy leh Sporting Goa te awmin Group B-ah Aizawl FC, Army Red, Dempo, Indian Air Force, Real Kashmir FC leh NEROCA te an awm thung. India rama knockout inelna ngaihhlut zinga mi Durand Cup hi August 28 khan khelh ṭan a ni a, DSK Shivajians chuan Rohit Kumar leh Kim Song-yong te goal hmangin Sporting Goa chu 2-1 in an hneh. Goan club goal awmchhun hi Victorino Fernandes khung a ni.

Aizawl FC-in Durand Cup an khelh avangin September 1 zana MPL zan match hmasa bera Chanmari FC nena an inkhel tur chu sawn a ni dawn a, semifinal (September 9) an thleng a nih chuan MPL-a Ramhlun North nen an inkhelh tur chu sawn a ni bawk ang. Durand Cup final hi ruahman dan chuan September 11 hian Ambedkar Stadium, Delhi-ah khelh a ni dawn.

Durand Cup hi Durand Football Tournament Society (DFTS) leh Osians ṭangkawpin an buatsaih a, kuminah hian champion-in cheng nuai 50 an dawng ang. He inelna hi 1888 aṭanga khelh
ṭan a ni. Kumin bikah hian team 'lian' tia sawi ṭhin East Bengal leh Mohun Bagan an tel lo a, Bengaluru FC lah AFC Cup khel turin an inbuatsaih a, Shillong Lajong leh Mumbai FC-in sawmna an hnar a, I League lam team an inlan tam lo a, lawmman erawh a san ber kum a ni.