England squad-ah Walcott a kir

Sam Allardyce chuan England manager a nih hnua a squad hmasa ber a puang a, Euro 2016 khelh zawh taka hmun chang phak lo Arsenal forward Theo Walcott chu September 4-a World Cup qualifier-a Slovakia hmachhawn tur squad-ah hian telh a ni.

Big Sam-a'n a sawi lawk ang ngeiin Manchester City manager Pep Guardiola mamawh loh Joe Hart chu England tana khel tur hian a ko a, Euro 2016-a lang phak lo zingah Leicester City midfielder Danny Drinkwater chu koh a ni bawk.

Euro 2016-a koh zingah Ross Barkley leh Arsenal midfielder Jack Wilshere ten Sam-a squad-ah hmun an chang phak lo a, Roy Hodgson-a duh lohEverton captain Phil Jagielka chu koh zingah a tel thung.

England kawr la ha ngai miah lo West Ham winger Michail Antonio chu a vawi khat nan ram tan koh a ni. Sam Allardyce chuan, "Antonio chanchin hi thawnthu ngaihnawm tak a ni a, non-league club aṭanga bul
ṭanin tunah chuan England tana khel turin koh a ni ta. Premier League-a a season hmasa berah goal kua khung nghalin ball cross thiam leh khung thei tak a ni," tiin a koh chhan a sawi.

Big Sam hian Sunderland manager a nih laiin Jermain Defoe chu England tana khel tura a ṭhat tawk thu a sawi a, Euro 2016 squad puan a nih dawn pawh khan khatih hunlaia England manager Roy Hodgson hnenah a striker hi ko turin thurawn a pe. Mahse, a hun a inher chhuak a, English manager hian a striker hlui hi a ko bik lo - Defoe hian season hmasa khan inelna hrang hrangah goal 18 a khung a, tun season-ah league match thum khelin goal hnih a khung leh der tawh bawk. A boss hlui ngaihtuahna erawh a luah phah chuang lo niin a lang.

England squad

Goalkeepers: Fraser Forster (Southampton), Joe Hart (Manchester City), Tom Heaton (Burnley).

Defenders: Gary Cahill (Chelsea), Nathaniel Clyne (Liverpool), Phil Jagielka (Everton), Danny Rose (Tottenham Hotspur), Luke Shaw (Manchester United), Chris Smalling (Manchester United), John Stones (Manchester City), Kyle Walker (Tottenham Hotspur).

Midfielders: Dele Alli (Tottenham Hotspur), Michail Antonio (West Ham United), Eric Dier (Tottenham Hotspur), Danny Drinkwater (Leicester City), Jordan Henderson (Liverpool), Adam Lallana (Liverpool), Wayne Rooney (Manchester United), Raheem Sterling (Manchester City), Theo Walcott (Arsenal).

Strikers: Harry Kane (Tottenham Hotspur), Daniel Sturridge (Liverpool), Jamie Vardy (Leicester City).