Athletics-ah Mizo nula leh tlangval inlan dawn

National Games 2025-ah vawiin hian Ganga Athletics Ground, Dehradun-ah athletics neih a ni dawn a, 100m mipa leh hmeichhia-ah Letjakai Lenthang (Republic Veng) leh Vanlaltleipuii Chhangte (East Lungdar) te an inlan dawn.

Republic Veng tlangval Letjakai hian 100m hi hi a tlan ṭhat berin 10.85 sec-ah a tlan thleng a, chutihrualin nikuma Nagaland-a neih North East Olympic-ah khan pangana a ni a, medal beisei ngam lo mah se heat paltlang theih dan a awm.

East Lungdar nula Tleipuii hian a tlan ṭhat berin 100m hi 13.8 sec-ah a tlan thleng a, NorthEast Olympic 2024-ah khan Mizoram aiawhin a kal ve bawk.

100m intlansiaka mipa record hi kum 2023 khan Manikanta Hoblidhar-a'n siam a, National Open Athletics Championships-ah 10.23 seconds-ah a tlan thleng. Hmeichhe lama record erawh kum 2021 khan siam a ni a, Indian Grand Prix 4-ah Duntee Chand chuan 11.17 a tlan thleng thung.

Mizoram tan Athletics-ah medal a beiseiawm lo a, chutihrualin hmasawn zel nan inelna hmachhawn hi a pawimawh hle. Coach Vanlalawmpuia Fanai chuan, "Kan tan chuan a level hi a la sang deuh a, India rama a ṭha berte hi chu kan la el pha lo. Chutihrualin wild card hmanga kan tel thei hi kan lawm a, national level inelnaa kal hi coaching lama kal duh pawhin a ṭangkai hle. Tuna kan tawnhriat hi hmasawn nan hman ngei kan tum ang," tiin Vanglaini a hrilh.