Leeds United-in goal khung an uar zel

Premier League kai thar Leeds United-in goal khung an uar chhunzawm zel a, a pawi ber erawh goal chhuah an uar tel hi a ni - Inrinni zan khan season hmasaa Championship lama an elpui Fulham chu 4-3 ngawtin an hneh.

Leeds hian minute 50 chhungin goal li an khung hman a, Helder Costa chuan goal hnih khungin Poland midfielder Mateusz Klich (penalty) leh Patrick Bamford-ten goal khat ve ve an thawh bawk - Bamford hian Liverpool lakah goal a khung tawh a, Fulham laka an penalty hmuh hi a hlawhchhuah a ni bawk. 

Inkhel boruak enin Leeds hi awlsam takin an chak dawn niin a lang tawh a, mahse an tlarhnung phui tawk lohna chu an tuar zui. Premier League-a lo tlangnel tawh sa Aleksandar Mitrovic chuan minute 34-na lekah penalty hmangin si phurh a sut ṭhen a, minute 67-naah a belhchhah bawk. 

Serbian striker-in goal a khung karah hian Bobby Decordova-Reid chuan goal khat a thawh ve bawk a, Fulham-in 'comeback' an beisei hman - a tawpah erawh goal li khungtu Leeds zawk an chak a, match hmasa pahnih aṭangin point thum an nei ta. 

Kum 16 hnua Premier League-a lo kir leh Leeds hian an match hmasa berah goal thum ngawt an lo khung tawh a, mahse an hmachhawn hi champion lai Liverpool an nih avangin 4-3 in an tlawm thung. 

Leeds boss Marcelo Bielsa chuan, "Kan khelh dan ber chu goal khungna chance insiam tum a ni a, mahse kan duh angin chance kan insiam tam lo - kan hun ṭha neih erawh goal-ah kan chantir zel thung a ni," tiin a sawi.