Zaninah Madrid derby khel dawn

Spanish football-a fixture ngaihven hlawh ber pawla chhal ngam, Madrid derby chu zanin dar 1:30 hian khelh a ni dawn a, Real Madrid khelmualah Atletico Madrid an leng dawn.

Ṭum dang zawng aiin zanin inkhel tur hi a 'hot' lehzual - La Liga-ah Real Madrid hian hma an hruai mek a, an hnuai chiaha awm chu Atletico an ni. Team pahnih inkarah point khat a awm!

Zaninah Atletico an chak chuan Real tlan pelin, league hmahruaitu an ni thei dawn a, Real tan an hmahruaina chhunzawm turin draw result chauh pawh a tawk thung - chak ngei erawh an duh ang.

Inbuatsaihna ṭha

Team pahnihin kar laihawlah inkhel pawimawh an nei ve ve a, Copa del Rey quarterfinal-ah an chak ve ve. Real Madrid-in Leganes hneh hram mah se, zanin an inkhel tur thlirin player an dah ṭha.

Real boss Carlo Ancelotti-a'n Thibaut Courtois, Jude Bellingham leh Kylian Mbappe te chu squad-ah takngial pawh a dah lo a, Vinicius Junior chu bench aṭangin a lut bawk.

Zaninah chuan player paliin bul an ṭan nghal ang a, tlarhmaa Rodrygo, Bellingham, Vinicius leh Mbappe te inkawp, tlarhnung khawng Atletico-in dan dan tur an lo ngaihtuah tur chu en châkawm a tling.

Atletico beiseina

Season ṭantir lamah Real leh Barcelona-in an tlansan hman viau a, mahse, November thla aṭangin Atletico an insiamṭha ṭan a, an league match hnuhnung 11-ah vawi khat chiah an tlawm.

Zaninah pawh Santiago Bernabeu-a inkhel tur ni mah se, inrintawkna nen an lenglut dawn a, chak an tum dawn - chumi tur chuan tlarhmaa inkawprem ṭan Antoine Griezmann leh Julian Alvarez ten mawhphurhna an lak ngam a ṭul ang.

Atletico tan hrem vangin centre back Robin Le Normand a inlan thei dawn lo a, tlarhnung laiah José María Giménez leh Clément Lenglet te an awm tho avangin lungphan lutukna tur erawh a ni lo.