Inter Milan an chak lo

Serie A champion lai Inter Milan chuan hmahruaitu nih theihna remchang an neih chu an bawhpelh - Ningani zan inkhelah Inter hi Fiorentina lakah 3-0 in an tlawm a, a chung berah an lawn thei rih ta lo.

Stadio Artemio Franchi-a inkhelah mualneitu Fiorentia tan hian Moise Kean chuan goal hnih a khung a, Luca Ranieri chuan goal khat a khung bawk, mikhual Inter Milan lamin a tawp thlengin a chhanletna tur an nei lo a ni.

Simone Inzaghi naute hian Serie A match 23 aṭanga point 51 hmuin pahnihna an ni mek a, an chungah point 54 hmutu Napoli an awm thung - season chawhnu lamah champion tumin inum boruak a sang chho dawn hle.

Inter Milan coach Simone Inzaghi chuan, "Chawlhlawk kan hman hma aṭang khan na takin min nawr tawh, goal chhuah thei kan ni tih pawh kan hria, chutiang chunga kan insiamṭha thei miah lo kha a pawi takzet.

"Chhuanlam siama indem buai hun a ni lo, engtiangin nge kan thawh chhuah leh nghal theih ang tih chu a pawimawh lai a ni. Ka naute hian match an khel tam em em a, an chau tawngkhawng ve pawh a ni ang," tiin a sawi.

Inter Milan leh Fiorentina te hi an inkhel leh nghal dawn - February 10, Thawhṭanni zan hian San Siro-ah Serie A match bawk khel turin Fiorentina hi an lenglut ve thung dawn a ni.

Hmahruaitu Napoli chu Pathianni zanah an inlan dawn. Antonio Conte naute hian Udinese an lenchilh dawn a, an chak a nih chuan Inter Milan nen an inkar an tizau leh rih thei ang.