Marcelo-a'n inkhelh a chawlhsan

Real Madrid leh Brazil defender hlui Marcelo chuan inkhelh a chawlhsan thu a puang - hun rei tak chhung a chenchilh tawh a mangṭha thu hi social media kaltlangin a puang a ni.

Marcelo hi kum 26 mi a ni tawh, a hun tam ber a hmanna Real Madrid tan La Liga nomawi paruk bakah Champions League nomawi panga ngawt a chawi a, Spanish club tan hian season 15 leh a chanve chhung tehmeuh hun a hmang.

Brazilian defender Marcelo chuan, "Player ka nih laia ka zinkawng chu tunah hian a lo tawp ta, chutihrualin football tan hian hlenchhuah tur tam tak ka la nei ve bawk," tiin a sawi a, an ram club Fluminense-ah a hun tawp a hmang tihna a ni.

Marcelo hian kum 18 mi a nih laiin Real Madrid a zawm, Spanish club tan hian nomawi 25 lain kum 120 chhunga Real Madrid tana nomawi chawi hnem ber a ni hial a, a hnuah Nacho, Luka Modric leh Dani Carvajal ten an rawn khum leh tawh a ni.

Hun rei tak chhung Real Madrid President ni tawh Florentino Perez chuan, "Real Madrid tan chauh a ni lo, khawvel huap pawhin left back ṭha berte zinga mi a ni, hun rei tak chhung a inkhel kan en thei kha a vanneihthlak hle," a ti.

Cristiano Ronaldo pawhin thlahna thu sawiin, "Hun rei tak chhung kan cheng dun a, hlawhtlinna hrang hrang changin theihnghilh ngai tawh loh hun kan hmang hnem hle. Ka ṭhian, khang hun zawng zawng avangte khan ka lawm.

"I hun kal zel tur atan duhsakna ka hlan bawk a che," a ti. Real Madrid tana an khelh dun laiin Ronaldo leh Marcelo te hi an inkawp rem hle a, goal leh nomawi tam tak an pet chhuak a ni.