Goa-in Odisha an hneh

Ningani zan khan Indian Super League inkhelah FC Goa chuan 2-1 in Odisha an hneh a, Jamshedpur an hneh loh hnu lawkah an insiamṭha lehnghal - Odisha tan erawh playoff khelh beiseina a chau sawt a, table-ah pasarihna an nih chhunzawm.

FC Goa tan Brison Fernandes chuan minute 29-naah goal hmahruai a khung a, minute kua hnu lawkah Odisha-in si phurh sutna remchang an nei. Striker chhuanvawr Diego Mauricio chuan Aakash Sangwan lakah penalty a hlawh chhuak a, mahse, Brazilian striker pet hi Goa keeper Hrithik Tiwari chuan ṭha zetin a dansak.

Goal dang lut loin chawlhlawk hman a ni a, second half ṭan aṭanga minute hnihna lekah Goa-in Odisha an hrem zui - Brison-a 'shot' bawk chuan Odisha midfielder K. Lalṭhathanga (Puitea) ke perin, goal-ah a lut.

Goan club-in goal hnih an khung hnuah Odisha tan Rahul KP chuan si phurh a sut ṭhen a, mahse, minute 73-naah Ahmed Jahouh chu a yellow card pahnihna avanga hnawhchhuah zui niin, player 10-a khel Odisha an tho tawh lo - an vanduai zan an tawng a ni ber.

Odisha tan Puitea bakah Isak Vanlalruatfela chuan inkhel bul a ṭan a, bench aṭangin Jerry Mawihmingthanga a lut thung - Goa tan Ayush Chhetri chu bench aṭangin luhtir a ni bawk.