Barca tan Torres-a hattrick

Copa del Rey quarterfinal-ah nimin zing khan Barcelona an inlan a, khualmualah Valencia chu 5-0 in an sawp - Ferran Torres chuan hattrick a siam a, Fermin Lopez leh Lamine Yamal ten goal khat ve ve an khung bawk.

Valencia aṭanga inzir chhuak Torres hian minute thumnaah goal khung ṭanin, minute 30 chhungin hattrick a siam fel der. Barca hian kar hmasa lawk khan league-ah Valencia hi 7-1 ngawtin an lo sawp tawh bawk. Catalan club hian Pathianni zan dar 1:30-ah league match khel turin Sevilla an lenchilh ang.

Ningani zan khan Real Sociedad chuan 2-0 in Osasuna an hneh bawk a, Ander Barrenetxea leh Brais Mendez ten goal an khung - goal hnih an chhuah hnuah Osasuna centre back Alejandro Catena chu hnawhchhuah a ni a, Osasuna tan thawhleh a harsa tawh.