Chelsea-in Guehi an beisei

Premier League club Chelsea chuan nipui transfer an thlir lawk leh der tawh a, Crystal Palace defender Marc Guehi chu lakluh an tum dawn niin khawthlang media-te chuan an tarlang.

English defender Marc Guehi hi thlasik transfer hman zawh takah khan Tottenham Hotspur chuan an tlarhnung buaina chingfel tura lakluh an tum a, mahse, pound maktaduai 70 vela an dawrna chu Palace hian an lo hnar.

Nipui lai khan Newcastle United chuan England international hi lakluh tumin vawi li ngawt an lo dawr tawh bawk a, Palace chuan an hnar vek - an dawrna sang ber hi £65mtd a ni.

Kum 24 mi Guéhi hi Chelsea academy chhuak niin, Blues senior team tan match hnih chiah a khel hman a, Swansea City-ah loan-a a khelh hnuin, kum 2021 khan Palace hi £18mtd-in a pan.

Tunah chuan amah hralhtu Chelsea chu a duhtu langsar an ni leh ta a, Blues chuan an player hlui hian Spurs aia a thlan an inbeisei. England tana vawi 22 inlan tawh Guehi hian tun season-ah Palace tan match 28 khelin goal thum a khung a, assist vawi khat a nei.

Chelsea hian zanin dar 1:30-ah FA Cup fourth round an khel dawn a, Brighton & Hove Albion an lenchilh ang.