Aston Villa-in Bertrand Traore an lalut

Premier League club Aston Villa-in transfer bazar-ah player an lakluh belh zel a, Lyon aṭangin forward  Bertrand Traore chu pound maktaduai 17-in an lalut. 

Kum 25 mi forward hian Villa Park-ah hian kum thum chhung khel turin contract-a ziak a, Chelsea-ah a lo khelh tawh ṭhin avangin Premier League-ah a mikhual lo. 

August 2010-a French club Auxerre aṭanga Chelsea academy zawmtu Traore hian 2015-16 season kha Blues tan a khel a, inelna hrang hrangah match 16 khelin goal li a khung. 

Chelsea-a a awm lai hian Dutch club Vitesse leh Ajax-ah te loan-a kaltir a ni a, kum 2017 khan Lyon chu a nghetin a zawm. French club-ah hian season thum chhungin inelna hrang hrangah match 126 khelin goal 33-a khung a, assist vawi 17-a nei bawk. 

Villa manager Dean Smith chuan, "Bertrand-a'n Villa-a lokal a thlang hi kan lawm takzet a, tlarhmaah duhthlan tur min pek belh dawn a ni," tiin a player thar chungchang a sawi.

Nipui transfer-ah Villa an che na a, Traore hma hian goalkeeper Emiliano Martinez (Arsenal), striker Ollie Watkins (Brentford) leh right back Matty Cash (Nottingham Forest)-te an lalut tawh a, pound maktaduai 83 bawr vel an seng tawh. 

Villa hian zanin dar 10:30-ah Premier League match khel turin Sheffield United an mikhual ang.