Son Heung-min ropui zan

Pathianni zan Premier League inkhelah Tottenham Hotspur forward Son Heung-min-a ropuina hmuh tirin kan awm a, South Korean striker hian Southampton an hmachhawnna inkhelah goal li ngawt a khung - Saints lakah hian 5-2 in an chak. 

St Mary's Stadium-a inkhelah mualneitu Southampton tan Danny Ings chuan minute 32-naah goal hmahruai a khung a, match hmasa bera Everton ngam lotu Spurs an chhaih kawlh tih reng an inhre lo. 

Son-a'n first half hun pek belh aṭangin goal a khung ṭan a, minute 73-a thlen meuh chuan goal li a khung fel der! South Korean striker goal khung hi Harry Kane-a siamsak vek a ni a, English striker hian an goal ngana a khung ve bawk. 

Jose Mourinho-a'n Europa League qualifier an khelh chauh avangin goal nga an khung hnuah Kane a la chhuak a, English striker hi Mohamed Salah (vs Watford, March 2018 - 4 goals, 1 assist) hnua Premier League match khata goal ngaa inrawlh thei hmasa ber a ni. 

Portuguese manager-in Kane-a lakchhuah hnuah 'drama' hmuh tur a la awm cheu a, Saints-in penalty an hlawh chhuak. Season hmasa Premier League-a goal 22 khungtu Ings-a'n vanneih vanga goal 20 chuang khung a ni lo tih pholangin goal-ah a chantir a, Saints thawhleh nan erawh a tlai tawh. 

Pathianni zan inkhelah Son leh Kane-te 'class' sanzia kan hmu a, Premier League-a striker hmuhnawm pahnih belhchhah turin Gareth Bale a awm dawn ta bawk - player pathum inkawp hun a nghahhlelhawm zual sawt a, Spurs fans tan chauh lo pawh en châkawm an tling ta. 

Spurs forward Son chuan, "A ropui takzet a, Premier League-a goal thum khung tlin theih hi chu chawimawina ropui a ni. Harry Kane hian assist pali ṭha tak tak piah lamah goal a khung a, Man of the Match chawimawina dawn a phu a ni," tiin a ropui zanah pawh midang a la fak cheu.