Aizawl FC-in Thangpuia an la lut

I League club Aizawl FC chuan tlarhnung thuam chak nan Services aṭangin loan hmangin Zothanpuia (Thangpuia) an la lut. Mizo club hian February 11, Thawhlehni zan dar 7:00 hian Inter Kashi an mikhual dawn.

Mizo defender Thangpuia hi palian lo mah se thahrui a nei ṭha a, game a chhiar thiam bawk avangin tlarhnungah player ṭha bik a ni. Mizoram Premier League aṭangin Thangpuia hian hming a chher ṭan a, MPL1 leh MPL2-ah best defender-a thlan a ni.

Kum 2014 khan Thangpuia telna Mizoram team-in Santosh Trophy nomawi an chawi a, Mizo tlangval hian football thiam vangin sipai a zawm. Services-ah Thangpuia hian duhsak a hlawh tawk lo a, khelhna hmun an pek meuh chuan hmun pawimawh changin kum nikum khan Santosh Trophy-ah nomawi chawiin kum 2023 khan National Games-ah a champion pui bawk.

Aizawl FC hian tun season-ah goal 29 an chhuah tawh a, I League kal mekah goal chhuah tam ber a ni a, tlarhnung thuam ṭhat hi an mamawh hle. Inrinni zan I League inkhelah table hnuai pahnih an inkhel a, SC Bengaluru-in Delhi FC 1-0 a an hneh avangin table mawngphah an chhuahsan.

Mizo club hian match 13 aṭangin point 10 an hmu a, an chunga awm Bengaluru hi point hnihin an pha lo a, an hnuaia awm Delhi FC aiin point khat chauhin an hmu sang bawk. I League aṭangin pahnih an relegate dawn avangin Victor Lalbiakmawia kaihhruai Mizo team hi tla thei dinhmunah an ding a, Mizo mipui thlawpna an mamawh hle.