Nu a nih hnuah Bencic a champion

Tennis player Belinda Bencic chuan fa a neih hnua a vawi khat nan nomawi a chawi - Switzerland star hian Abu Dhabi Open final-ah Ashlyn Krueger hnehin a champion a ni.

Olympic champion pawh lo ni tawh Bencic hian set a hloh hmasak hnuah, a khingpui American nula Krueger hi 4-6, 6-1, 6-1 in a hneh a, title a lak tawh zingah a hlu ber pawl a ni ngei ang.

Kum 27 mi Bencic hian a fa hmasa ber atan Bella a nei a, nau a pai aṭanga tennis a khelh leh chhung hi kum khat chuang niin, fa a neih aṭanga chhut erawh chuan thla li hnu lekah hlawhtlinna a chang leh ta a ni.

Zayed Sports City International Tennis Centre-a hnehna a chan hnuah Bencic chuan, "Tennis ka la khel ve leh ang tih chu ka ngaihtuah ṭhin a, tun anga hma hian ka champion leh ang tih erawh ka ngaihtuah phak bik lo.

"Abu Dhabi hian hlimna min pe a, ka pasal leh fanu Bella te tan tun ṭuma ka hlawhtlinna hi ka hlan, ka inkhelhna kianga an lo awm ve te khan a ti hlu zual em em bawk a ni," tiin a sawi.

Hun rei tak a chawlh avangin a ranking pawh a hniam hman hle, mahse tuna a champion leh tak avang hian tennis ranking chhuak tharah chuan world number 65 a ni phak leh tawh ang.