Man City an chak hram

Arsenal laka mualpho Manchester City an la insiamrem thei lo. Pep Guardiola hote hian League One club Leyton Orient chu 2-1 in an lehthal hram.

Brisbane Road-ah goal ropui hmuhin a awm a, minute 16-naah yard 50 aṭangin Leyton Orient midfielder Jamie Donley chuan goal-ah a pet thut a, goalkeeper Stefan Ortega khumin crossbar a per a, hemi per let hian German keeper hi fuhin goal-ah a lut.

Real Madrid nena Champions League-a inhmachhawn mai tur Manchester City-in ngai la awh thei lo mah se hnehna erawh an la chang tho. Man City defender thar Abukodir Khusanov-a'n minute 56-naah si phurh a sut a, goal luh danah erawh Khusanov tan inchhuanna tur a awm lo. Rico Lewis-a ball petin a perin avangin goal-ah a lut.

Minute 72-naah Kevin de Bruyne a rawn lut a, minute sarih hnuah goal a khung. Jack Grealish-a ball fing chu KDB-a'n um lutin chakna goal-ah a chantir. Man City hian Premier League-ah beisei an pha lo a, FA Cup leh Champions League-ah an insawrbing a ṭul hle.